बागलुङ। अविरल वर्षासँगै आएको पहिरोले बागलुङका विभिन्न स्थानमा घर पुरिँदा १० जनाको मृत्यु भएको छ भने एक जना बेपत्ता भएका छन्। असोज १० र ११ गते परेको लगातारको वर्षापछि तमानखोला, निसीखोला र ताराखोला गाउँपालिकाका विभिन्न क्षेत्रमा पहिरो गएको हो।

तमानखोला गाउँपालिका-४, सन्तरमा पहिरोले घर पुरिँदा ६५ वर्षीया उदिसरा विक र ५० वर्षीय हस्तवीर विकको मृत्यु भएको छ। सोही घटनामा ५२ वर्षीया पुनसरा विक बेपत्ता रहेकी छन्।

त्यस्तै, तमानखोला गाउँपालिका-३, धनारकुकमा पहिरोमा परी ८० वर्षीय बुद्धिराज घर्ती र ६६ वर्षीया भीमदेवी घर्तीको मृत्यु भएको छ।

निसीखोला गाउँपालिका-६, सेलवाङका ५० वर्षीय सूर्यबहादुर घर्ती पनि पहिरोमा परी मृत्यु भएको छ।

यसैगरी, निसीखोला गाउँपालिका-३, कन्केखरियामा पहिरोले घर पुरिँदा एकै परिवारका चार जनाको मृत्यु भएको छ। मृत्यु हुनेमा ३६ वर्षीया श्यामकुमारी विक, १३ वर्षीय मनोज विक, ८ वर्षीय मुकेश विक र ३ वर्षीय निशान विक रहेका छन्।

ताराखोला गाउँपालिका-५, धरर्मरका ५९ वर्षीय मनबहादुर रोक्काको पनि पहिरोमा परी मृत्यु भएको छ।

अविरल वर्षासँगै आएको पहिरोका कारण जिल्लाका विभिन्न स्थानमा घर तथा भौतिक संरचनामा समेत क्षति पुगेको छ। प्रभावित क्षेत्रमा स्थानीय प्रशासन, सुरक्षा निकाय तथा अन्य सम्बन्धित निकायको समन्वयमा उद्धार तथा खोजी कार्य जारी रहेको छ।

घटनाबारे थप विवरण संकलन गर्ने तथा क्षतिको यकिन विवरण निकाल्ने काम भइरहेको सम्बन्धित निकायले जनाएको छ।