काठमाडौं । जय नेपाल पार्टीले आफ्ना केन्द्रीय सदस्य कासिन्द्रा यादवलाई सिराहामा हिरासतमा लिइएको भन्दै तत्काल रिहा गर्न सरकारसँग माग गरेको छ ।

पार्टीका सचिवालय प्रमुख सगुन सुन्दर लावतीले बिहीबार विज्ञप्ति जारी गर्दै प्रत्येक नागरिकलाई आफ्नो राजनीतिक मान्यता र धार्मिक आस्थाअनुसार क्रियाशील हुने अधिकार संविधानले सुनिश्चित गरेको उल्लेख गरेका छन् ।

हिन्दु धर्मको पक्षमा वकालत गर्नु वा अभिव्यक्ति स्वतन्त्रताको प्रयोग गर्नु कानुनविपरीत कार्य नभएको भन्दै पार्टीले यादवलाई सामाजिक सद्भाव भड्काएको आरोपमा हिरासतमा लिइएको घटनाप्रति आपत्ति जनाएको छ ।

राजनीतिक पूर्वाग्रह राखेर नागरिकलाई अनावश्यक दुःख दिने कार्य कानुनी राज्यको मान्यताविपरीत हुने भन्दै पार्टीले यादवलाई शीघ्र रिहा गर्न सरकारको ध्यानाकर्षण गराएको छ ।