काठमाडौं । नेपाली कांग्रेसका सभापति गगन थापाले लोकतान्त्रिक अभ्यासलाई बलियो बनाउन मुलुकका हरेक क्षेत्रमा खुला बहस र संवादको थलो आवश्यक रहेको बताएका छन्।

कांग्रेसको १५औँ महाधिवेशनको उद्घाटन सत्रलाई आइतबार भृकुटीमण्डपस्थित खुलामञ्चमा सम्बोधन गर्दै थापाले खुलामञ्चलाई भौतिक स्थानका रूपमा बुझ्न नहुने बताए। उनका अनुसार यो राजनीतिक स्मृति, बहस र नागरिक संवादको साझा थलो पनि हो।

संसद्मा प्रधानमन्त्री वालेन्द्र शाहको उपस्थितिको प्रसंग उठाउँदै थापाले संसद् खुला र जीवन्त बहसको थलो बन्नुपर्ने बताए। ‘खुलामञ्च त संसद्मा चाहिएको छ, तर दुर्भाग्य अहिले संसद् खुला छैन, बन्द छ,’ उनले भने।

‘जुन दिनसम्म प्रधानमन्त्री संसद्मा सम्मानपूर्वक उपस्थित हुनुहुन्न, त्यो दिनसम्म संसद् खुला छैन, बन्द नै मानिनेछ,’ थापाले भने।

कांग्रेसको इतिहासमा खुलामञ्चले ठूला राजनीतिक संकल्प पूरा गर्न प्रेरणा दिएको उल्लेख गर्दै उनले १५औँ महाधिवेशनबाट पनि नयाँ संकल्पसहित अघि बढ्नुपर्ने बताए। देश र नागरिकबीच निरन्तर संवादका लागि खुला मञ्चको आवश्यकता रहेको उनको भनाइ थियो।

‘यो मतभेदलाई साझा मञ्चमा राख्ने थलो हो। देश र नागरिकका बीचमा संवादको खुला मञ्च चाहिएको छ,’ उनले भने।

थापाले सामाजिक सञ्जाललाई समेत गालीगलौजको माध्यम नभई तथ्य र तर्कसहितको बहस गर्ने खुला मञ्चका रूपमा विकास गर्नुपर्ने बताए।

पार्टीभित्रको आन्तरिक लोकतन्त्रलाई बलियो बनाउन नेतृत्वमाथि प्रश्न उठाउने वातावरण आवश्यक रहेको उल्लेख गर्दै उनले प्रश्न गरेकै आधारमा कारबाही गर्ने नभई प्रश्नलाई स्वागत गर्ने संस्कार विकास गर्नुपर्ने बताए।

‘पार्टीभित्र नेतृत्वमाथि प्रश्न गर्दा कारबाही हुने होइन, प्रश्नलाई स्वागत गर्ने खुला मञ्च चाहिएको छ,’ थापाले भने।