काठमाडौं । कमेडियनभन्दा रास्वपाको प्रचारक देखिएका हिमेश पन्तले उनकै दलका सांसद खगेन्द्र सुनारको विवादित अडियोमा आवाज नचिनेको बताएका छन् ।

सभापति रवि लामिछाने विगतमा विभिन्न सहकारीबाट ग्यालेक्सी फोरके टेलिभिजनमा बचतकर्ताको अर्बौँ पैसा आएको विषयमा प्रहरीलाई बयान दिँदा ‘थाहा भएन’ भन्थे ।

अहिले पन्तले अडियोमा खगेन्द्रको आवाज भए पनि ‘आवाज चै कसैको चिनिसिएन’ भनेका हुन् ।

उनले पीडित महिलालाई खिसिटिउरी पनि गरेका छन् । ‘आफूमाथि त्यति सारो अन्याय गर्नेलाई पनि कति मिजासले बोलिसेको छ, अडियो हामीले पनि सुनिसियो ।’

पीडित महिला अडियो सुन्दा निकै डराएको सुनिन्छ । सांसद खगेन्द्रबाट ज्यान तलमाथि हुने भय भएको अनुमान गर्न सकिन्छ । किनभने सांसद सुनारले पैसा साँझसम्म नभए रगत खाने भनेको प्रष्ट सुनिन्छ ।

यस्तोमा महिला डराउँदै सम्मानपूर्वक बोलेको विषयलाई रास्वपाको प्रचारक पन्तले पीडित महिलालाई गिज्याएका हुन् ।

अझ उनले मानवीय संवेदनाहीन हुँदै भनेका छन्, ‘भनिसियोस्, गरिसियोस्, हजुरले पिटिसिन्छ, नाङ्गो बनाइसिन्छ, भिडियो बनाइसियो, पैसा मागिसिन्छ, पूर्वमन्त्रीको बोल्ने तरिका राम्रो लाग्यो ।’

महिलाको पीडामा मजाक गर्ने पन्तलाई कमेन्टमा थुप्रैले गाली वर्र्षाएका छन् ।