काठमाडौं । नेपाली चलचित्रलाई अन्तर्राष्ट्रिय बजारमा पुर्‍याउने लक्ष्यसहित निर्माण गरिएको फिल्म ‘हिमालयन गोल्ड’को ट्रेलर सार्वजनिक भएको छ। नेपालको इतिहास, संस्कृति र मौलिकतालाई विश्वमाझ चिनाउने उद्देश्य राखिएको यस फिल्मले कथावस्तुसँगै दिग्गज अभिनेता सुनिल थापाको अन्तिम फिल्मका रूपमा पनि विशेष महत्त्व राखेको छ।

धिराज राजवंशीको निर्देशनमा बनेको सर्भाइभल कथामा आधारित फिल्म आगामी मंसिर ४ गतेदेखि प्रदर्शनमा आउनेछ। फिल्ममा सुनिल थापासँगै परीक्षा लिम्बू, कर्मा शाक्य, राहुल एन. मुखिया र सजन थापाको अभिनय रहेको छ।

‘हिमालयन गोल्ड’ को सबैभन्दा महत्त्वपूर्ण पक्ष यसको अन्तर्राष्ट्रिय प्रदर्शनलाई मानिएको छ। निर्माण पक्षका अनुसार यो भारतभर एकसाथ प्रदर्शन हुने पहिलो नेपाली फिल्म बन्नेछ। यसका लागि भारतको चर्चित वितरण कम्पनी एए फिल्म्ससँग औपचारिक सम्झौता भइसकेको छ।

एए फिल्म्सले ‘दिलवाले दुल्हनिया ले जाएंगे’, ‘बाहुबली’, ‘आरआरआर’, ‘केजीएफ च्याप्टर २’ र ‘पुष्पा’ जस्ता चर्चित फिल्म वितरण गरिसकेको छ। यस कम्पनीसँगको सहकार्यले नेपाली फिल्मलाई भारतीय बजारमा नयाँ अवसर प्रदान गर्ने अपेक्षा गरिएको छ।

निर्देशक राजवंशीका अनुसार फिल्म भारत, जापान र अस्ट्रेलियालगायतका देशमा स्थानीय भाषाका सबटाइटलसहित नेपाली भाषामै प्रदर्शन गरिनेछ। फिल्मको मौलिकता जोगाउने उद्देश्यले हिन्दीमा डब गर्ने प्रस्ताव अस्वीकार गरिएको उनले बताएका छन्।

निर्माता तथा वितरक नकिम उद्दिनले पनि अन्तर्राष्ट्रिय बजारमा नेपाली फिल्मको सम्भावना राम्रो रहेको उल्लेख गर्दै ‘हिमालयन गोल्ड’को प्रदर्शनले नेपाली चलचित्रलाई विश्व बजारमा विस्तार गर्न सहयोग पुग्ने विश्वास व्यक्त गरेका छन्।