रास्वपा नेताहरूको बहुचर्चित ५ काण्ड
काठमाडौं । काण्डैकाण्डमा रास्वपाका नेताहरू मुछिन थालेका छन् । विगतमा कांग्रेस, एमाले र नेकपाको सरकारलाई उनीहरू भन्थे- ‘काण्डे सरकार ।’
तर, हालै खगेन्द्र सुनारको महिला नेताको ‘रगत खाने’ भन्ने अडियो काण्ड सार्वजनिक भयो । उनी यसअघि पनि अनेक काण्डैकाण्डमा मुछिएका सांसद हुन् । कानुनअनुसार दण्डित भने भएका छैनन् ।
अब बालेन सरकारले उनलाई अडियो काण्डमा जोगाउँछ कि कारबाही गर्छ ? त्यो हेर्न बाँकी छ । यदि जोगाए बालेन सरकार पनि काण्डे सरकार हुनेछ ।
खगेन्द्रभन्दा अघि रास्वपाकै सांसद कृष्ण कार्कीले एक नाइजेरियन महिलालाई गर्भवती बनाएको काण्ड बाहिरिएको थियो । यो काण्ड बाहिरिएपछि उनी थुप्रै दिन लापत्ता भए । उनको चौतर्फी आलोचना भयो । तर, उनले विदेशी युवतीलाई गर्भवती बनाएको काण्डबारे एक शब्द बोलेनन् ।
गृहमन्त्री सुधन गुरुङको शेयर काण्ड गत वैशाखमा सार्वजनिक भयो । त्यही काण्डले उनको गृहमन्त्री पद पनि खुस्कियो । तर, छानबिन प्रतिवेदन बालेन सरकारले दराजमा लुकायो । अनि गुरुङलाई निर्दोष ठहर्याए । बरु कानुनलाई पो दोषी माने । अनि, फेरि गृहमन्त्री बनाएका छन् । तर, उनी शेयर काण्डले दागी नेता भएका छन् ।
गत जेठको दोस्रो साता अर्थमन्त्री स्वर्णिम वाग्ले बीवाईडी काण्डमा मुछिए । यो देशलाई २ अर्ब नोक्सान पुर्याएको बहुचर्चित काण्ड हो । बजेटबाट कर बढ्ने सूचना सुटुक्क एक व्यापारीलाई चुहाएको र ती व्यापारीले रातारात चीनबाट सयौँ बीवाईडी गाडी नेपाल भित्र्याएकी थिइन् ।
बालेन सरकारले यो काण्डको छानबिनको नाटक गर्यो र वाग्लेलाई सफाइ दियो । राज्यलाई नोक्सान पुर्याएको बीवाईडी काण्ड सामसुम पार्यो ।
अझ रास्वपा सभापति रवि लामिछाने त सहकारी काण्डमा मुछिएका नेता हुन् । अझै उनी अदालत धाइरहन्छन् ।
कसैले साग बेचेर त कसैले मकै बेचेर सहकारीमा बचत गरेको अर्बौ पैसा जीबी राई र छविलाल जोशीसँग मिलेर रविले झ्वाम पारेको आरोप छ । काठमाडौं, कास्की, रुपन्देही, पर्सा र चितवनमा उनीविरुद्ध मुद्दैमुद्दा छन् ।
यसरी रवि सहकारीकाण्डसँग जोडिएका नेता हुन् । अरु थुप्रै नेता सिंहदरबार, संसद भवन र सर्वोच्च अदालत खरानी पारेको काण्डमा मुछिएका छन् ।
यसरी देश बनाउँछु भन्ने, अरुलाई ३५ वर्षसम्म लुटेको भन्ने रास्वपा नेता, सांसद र मन्त्रीहरू पनि एकपछि अर्को काण्डमा मुछिइरहेका छन् । यसले उनीहरू पनि
काण्डैकाण्डमा मुछिँदै जाने र बालेन सरकारलाई काण्डे सरकार र रास्वपालाई काण्डे पार्टी बनाउने खतरा बढेको देखिन्छ ।
