बेइजिङले ‘इरानको सार्वभौमिकता र सुरक्षा रक्षा गर्ने’ बिषयमा तेहरानलाई समर्थन गर्ने चीनका शीर्ष कूटनीतिज्ञले एक वरिष्ठ इरानी अधिकारीसँगको संवादमा बताउनुभएको छ।

सोमबार बेइजिङमा भएको भेटमा उहाँहरूबीच संवाद भएको थियो ।यो भेट अमेरिकी आक्रमण दोहोरिने जोखिम बढेपछि भएको हो ।

राष्ट्रपति डोनाल्ड ट्रम्पले शनिबार भन्नुभएको थियो,“संयुक्त राज्य अमेरिकाले इरानको धेरैजसो सैन्य क्षमता नष्ट गरिसकेको छ तर अझै एक–दुई लक्ष्य ‘सम्हाल्न’ बाँकी छ ।

तेहरानले भने आक्रमण भए प्रतिशोध लिने चेतावनी दिएको छ ।

“चीनले इरानलाई आफ्नो सार्वभौमिकता र सुरक्षा रक्षा गर्न समर्थन गर्छ,” चीनका विदेशमन्त्री वाङ यीले इरानको सर्वोच्च राष्ट्रिय सुरक्षा परिषद्का उपमन्त्री अली बाघेरी कानीसँगको भेटमा भन्नुभएको हो । चिनियाँ विदेशमन्त्रालयले एक वक्तव्य जारी गरी यसको पुष्टि गरेको छ ।

विदेश मन्त्रालयले यसअघि बाघेरी कानीको बेइजिङ भ्रमणको घोषणा गरेको थिएन । “सबै पक्षले तर्कसङ्गत र व्यावहारिक भावनाका साथ राजनीतिक समाधानमा ध्यान दिनुपर्छ र फेरि एकपटक सशस्त्र द्वन्द्वको बाटोलाई त्याग्ने प्रण गर्नुपर्छ,” वाङले इरानी कुटनीतिज्ञ बाघेरी कानीसँगको भेटमा उहाँसँग भन्नुभयो ।

चीन इरानको प्रमुख आर्थिक साझेदार हो । उसले मध्यपूर्वमा महिनौँदेखि चलिरहेको द्वन्द्वमा तनाव कम गर्न प्रयास गर्दै आएको छ । यो द्वन्द्व कहिलेकाहीँ छिमेकी देशहरूमा पनि फैलिएको छ । यस महिना चीनले आफ्नो मध्यपूर्व दूतलाई इरान, ओमान र साउदी अरब पठाउनेछ।

मन्त्रालयका प्रवक्ताले नियमित पत्रकार सम्मेलनमा भन्नुभएको छ, “यो ‘शान्ति वार्तालाई प्रोत्साहन र तनाव कम गर्न लक्षित महत्वपूर्ण कूटनीतिक भ्रमण’ हो।”

सोमबार नै चिनियाँ राष्ट्रपति सी जिनपिङले ओमानका सुल्तानसँग बेइजिङमा वार्ता गर्नुभएको छ । कूटनीतिक सम्बन्ध स्थापना भएयता यो ओमानका राष्ट्रप्रमुखको चीनको पहिलो भ्रमण हो । सीले हैथम बिन तारिकसँग भन्नुभयो, “चीन क्षेत्रमा ‘शान्ति, स्थिरता र समृद्धिमा योगदान दिन तयार छ ।

चिनियाँ समाचार संस्था सिन्ह्वाले राष्ट्रपति सीको भनाई उद्धृत गर्दै भनेको छ, “मध्यपूर्व ‘ठूला देशहरू प्रतिस्पर्धा र भूराजनीतिक द्वन्द्वको कुस्ती मैदान’ बन्नु हुँदैन ।”