मोरङ / कोशी प्रदेशमा सरकार गठनका लागि प्रदेश प्रमुखले दिएको समय सीमा आज बेलुका ५ बजे सकिदैँछ ।

संविधानको धारा १६८ को उपधारा २ बमोजिम दुई वा दुई दलको समर्थनमा मुख्यमन्त्रीमा नियुक्तिका लागि दाबी हुन नसके धारा १६८ को उपधारा ३ बमोजिम प्रदेश सभाको ठूलो दलका नेतालाई मुख्यमन्त्रीमा नियुक्ति गर्ने प्रक्रिया शुरु हुने प्रदेश प्रमुखको कार्यालयले जनाएको छ ।

गठबन्धन दलहरूबीच जसको नेतृत्वमा जाँदा बहुमत जुट्छ, उसकै नेतृत्वमा जाने सहमति भएको छ । स्रोतका अनुसार उद्धव थापाकै नेतृत्वमा सरकारको दाबी पेश हुनेछ । प्रष्ट बहुमत नदेखिएकाले यसअघि मुख्यमन्त्री दाबी गर्दै आएका माओवादी केन्द्रका नेता इन्द्रबहादुर आङ्बोले मुख्यमन्त्रीको दाबी गरेका छैनन् । त्यो अवस्थामा थापाले नै मुख्यमन्त्रीमा दाबी पेश गर्नेछन् ।

९३ सदस्यीय कोशी प्रदेशमा नेकपा एमालेको ४०, नेपाली कांग्रेसको २९, माओवादी केन्द्रको १२, राप्रपाको ६, नेकपा एकिकृत समाजवादीको ४ र जनता समाजवादी पार्टीको एक जना गरी ९२ जना र सभामुख रहेका छन् ।

गठबन्धन दलसँग सभामुखबाहेक ४६ मत छ । उनले राजीनामा दिएको अवस्थामा भने गठबन्धनसँग बहुमत पुग्ने संख्या ४७ हुनेछ । त्यही कारण पनि सभामुखलाई राजीनामा गराउन गठबन्धन दलहरू छलफलमा छन् । यद्यपी सभामुख गौतमले भने विश्वासको मत पाउने आधार नभई राजीनामा नदिने अडान लिएका छन् ।