काठमाडौँ- प्रतिनिधिसभाका सभामुख देवराज घिमिरेले संसदीय समितिका सभापतिहरूलाई समितिमा रहेका विभिन्न विधेयकलाई कार्ययोजना बनाएर समयमा नै टुङ्ग्याउन निर्देशन दिएको छ।

प्रतिनिधिसभा मातहतका विभिन्न समितिका सभापतिसँग आज (बुधबार) भएको छलफलमा उनले सदनलाई प्रभावकारी तुल्याउनका लागि बिजनेस दिलाउन समितिमा भएका विधेयकलाई गहिरोसँग छलफल यथाशीघ्र टुङ्ग्याउने कार्यमा सक्रियताका साथ लाग्न सुझाव दिए।

उद्योग तथा वाणिज्य र श्रम तथा उपभोक्ताहित समितिका सभापति अब्दुल खानले सभामुखबाट समितिमा के–कति विधेयक छ? छलफलको अवस्था कस्तो छ? कहिलेसम्म टुंगोमा पुर्‍याउन सकिन्छ? भनी जिज्ञासा राखेको बताए।

उनले समितिमा के-कस्ता समस्या छन्? बैठकलाई कसरी प्रभावकारी गर्न सकिन्छ? र विधेयकलाई छिटो अघि बढाउन आफ्नोतर्फबाट कस्तो सहयोगका अपेक्षा गर्नुभएको छ भनी सभामुखले चासो देखाएको बताए।

यसअघि छलफलमा उपस्थित समिति सभापतिले आआफ्ना समितिमा भएगरेका काम, उपलब्धि र चुनौतीबारे सभामुखलाई जानकारी गराए। कतिपय समितिमा चार/पाँच वटा विधेयक रहेको भए पनि केहीमा भने एउटा पनि विधेयक नरहेको त्यस अवसरमा सभामुखलाई जानकारी गराइयो।

केही सभापतिले भने समितिमा रहेका कतिपय विधेयकमाथि धेरै नै संशोधन परेको र साँघुरो बैठक कक्ष भएका कारण बैठक व्यवस्थापनमा चुनौती रहेको जानकारी गराए। बैठकमा सभापतिले बजेटलगायत विषयमा सभामुखको ध्यानाकर्षण गराएका थिए।

राज्यव्यवस्था समितिका सभापति रामहरि खतिवडाले विधेयकलाई चाँडो निष्कर्षमा पुर्‍याउन र सदनलाई कसरी नियमित गर्ने भन्नेबारे सभामुखले छलफलमा चासो राखेको बताए।