काठमाडौँ, २२ साउन : नेपाल कम्युनिष्ट पार्टी (एकीकृत समाजवादी) का अध्यक्ष माधवकुमार नेपाललाई सम्मान गरिएको छ ।आज यहाँ पार्टी केन्द्रीय कार्यालय आलोकनगरमा आयोजित कार्यक्रममा पुराना कम्युनिष्ट नेताहरूको समूहले नेपाली कम्युनिष्ट आन्दोलनको विकासमा अध्यक्ष नेपालले पुर्‍याउनुभएको योगदान स्वरूप उहाँलाई सम्मान गरेको हो ।

कम्युनिष्ट नेता तथा विश्लेषक सिद्धिलाल सिंह, कमल कोइराला, गोपीरमण उपाध्याय, न्हुछेबहादुर ढुकुजु, नारायणप्रसाद वैद्यलगायतले अध्यक्ष नेपाललाई सम्मान गर्नुहुँदै दशौँ राष्ट्रिय महाधिवेशनबाट सर्वसम्मत अध्यक्ष चयन हुनुभएकोमा बधाई तथा कार्य सफलताको शुभकामना दिनुभयो ।

त्यस अवसरमा नेता कोइरालाले नेपालको कम्युनिष्ट आन्दोलनमा अध्यक्ष नेपालले पुर्‍याएको योगदानको प्रशंसा गर्नुभयो । उहाँले सम्मान कार्यक्रमले देश र जनताप्रति समर्पित रहन आगामी पुस्तालाई उत्प्रेरित गर्दै जाने भएकाले यस्तो कार्यक्रमलाई निरन्तरता दिइने बताउनुभयो । नेता उपाध्यायले जनताप्रति समर्पित हुँदै नेपालको कम्युनिष्ट आन्दोलनलाई थप सशक्त बनाउन अध्यक्ष नेपालको कुशल नेतृत्वमा पार्टी सुदृढ हुने विश्वास व्यक्त गर्नुभयो ।

अध्यक्ष नेपालले प्राप्त सम्मानले आफ्नो काँधमा जिम्मेवारी थपिएको अनुभूत गरेको भन्नुहुँदै आगामी दिनमा देश र जनताका पक्षमा थप क्रियाशील हुने प्रतिबद्धता व्यक्त गर्नुभयो ।