काठमाडौँ । राष्ट्रपति रामचन्द्र पौडेलले हाल देशमा उत्पन्न परिस्थितिबारे गम्भीर चिन्ता व्यक्त गरेका छन् । उनले ‘जेनजी’ पुस्ताले गरेको प्रदर्शनका क्रममा ठुलो संख्यामा नागरिक हताहत भएको घटनाबाट आफू मर्माहत भएको बताएका छन् । राष्ट्रपति पौडेलले घटनामा ज्यान गुमाएका परिवारप्रति गहिरो समवेदना र सहानुभूति व्यक्त गरेका छन् ।

उनले घाइतेहरूको तत्काल उपचारका लागि सरकारलाई आग्रह पनि गरेका छन् । उनका प्रेस सल्लाहकार किरण पोखरेलले दिएको जानकारीअनुसार राष्ट्रपति पौडेलले अप्रत्याशित रूपमा भएको यो घटनाले आफूलाई चिन्तित तुल्याएको बताएका छन् । उनले वर्तमान विषम परिस्थितिलाई ध्यानमा राखेर शान्ति र संयमपूर्वक समस्याको निकास निकाल्न सबै पक्षलाई अपिल गरेका छन् ।