काठमाडौं । आन्दोलनकारीको कब्जामा रहेको राजधानी काठमाडौं आज सेनाले नियन्त्रणमा लिएको छ । सेनाले सुरक्षाको नेतृत्व लिएपछि हिजोभन्दा आज काठमाडौंको अवस्था सामान्य बन्दै गएको देखिन्छ ।

सडकका चोक चोकमा सैनिकहरूले पहरा दिइरहेका छन् । कर्फ्यू आदेश जारी भएकाले सवारीसाधनहरू नगण्य मात्रामा मात्रै चलेका छन् । सेनाले अत्यावश्यक कामका लागि हिँडेकाहरूलाई उनीहरूको परिचयपत्र हेरेर आउन–जान अनुमति दिइरहेका छन् । आम मानिसहरु भने आ–आफ्नो घरभित्रै छन् ।

यस्तै जेनजीको आन्दोलन पनि मत्थर बनेको छ । अहिले जेनजी युवाहरुले काठमाडौंका सडक सफा गरिरहेका छन् । आन्दोलन, तोडफोड र आगजनीका क्रममा भएको फोहोर सफा गर्न युवाहरु खटिएका हुन् । उनीहरुले अहिले मीनभवन, बानेश्वर सडकखण्डमा सफाइ गरिरहेका छन् ।

सडक र सडक किनारमा छरिएका प्लास्टिक, कागज, पानीका बोतल लगायतका फोहोर उनीहरु उठाइरहेका छन् । सडकमा जलाइएका मोटरसाइकल, टायरहरु पनि उनीहरुले पन्छाइरहेका छन् । सडक सफाइमा खटिएकाहरुले ‘हामी यो देशका नागरिक हौं, अरू केही होइन’ भनेका छन् ।