काठमाडौं । जेनजी अभियन्ता मिराज ढुंगानाले वर्तमान सरकारको म्याण्डेट केबल चुनाव गराउनु मात्रै नभएको बताएका छन् । आज (शनिबार) काठमाडौंको एभरेष्ट होटलमा पत्रकार सम्मेलन गर्दै ढुंगानाले त्यस बाहेक अरू थुप्रै म्याण्डेटहरू रहेकाले त्यसलाई पूरा गर्नतर्फ सरकार लाग्नुपर्ने बताएका छन् ।

‘प्रधानमन्त्री ज्यूलाई यहींबाट भन्छु यो चुनावी सरकार होइन । भ्रममा नबस्नु होला । हामी जनताले दिएको म्याण्डेट लिएर जान्छौं । यसलाई छाड्नेवाला छैन,’ उनले भने । जेनजीको मुख्य एजेण्डा प्रत्यक्ष निर्वाचित प्रधानमन्त्री भएकाले त्यसका लागि पनि सरकार तयार हुनुपर्ने बताएका छन् ।

यद्यपि अन्तरिम सरकार र संसद भंग भएको अवस्थामा वैधानिक तवरले त्यो एजेण्डा कार्यान्वयन गर्न नसकिने भनेर उपस्थित पत्रकारले बुझाएका थिए । जबाफमा ढुंगानाले संविधानसम्मत ढंगले गर्न नसकिने बताए ।

‘प्रत्यक्ष निर्वाचित कार्यकारी प्रमुखको विषयमा अहिले संविधानसम्मत हिसाबबाट जान मिल्दैन,’ उनले भने, ‘हाम्रो सरकार पनि संविधानसम्मत त होइन । जनताको म्याण्डेट त त्यही हो नी । त्यसलाई छाड्न मिल्ने कुरै भएन ।’ उनले संशोधनका लागि जे गर्नुपर्छ त्यो गर्ने बताएका छन् । ‘संशोधन गरौंला । के गरौंला, गर्नेबेला गरौंला । गर्न चाहिँ गर्छौं । नगरी जाँदैनौं,’ उनले भने ।