काठमाडौं । नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ ले माधव नेपालसँगको सहकार्य हठात नभएको भन्दै यसको इतिहास झण्डै ४० वर्ष पुरानो रहेको बताएका छन् । उनले माओवादी केन्द्र, एकीकृत समाजवादीसहितका दर्जनौं वाम घटकबीचको हालको एकतालाई केवल चुनाव जित्नको लागि नभई लामो समयदेखि चलेको सहकार्य र संवादको परिणाम भएको बताए ।

प्रचण्डले दाङको देउखुरीमा आयोजित एकता सन्देशसभालाई सम्बोधन गर्दै भने, ‘२०४१-०४२ सालतिर कमरेड माधवकुमार नेपाल र म लगायत धेरै पञ्चायतविरोधी आन्दोलनमा संवाद र सहकार्य गर्दै आएका थियौं । ०४२ देखि ०४६ सालसम्म र जनयुद्धको क्रममा पनि लगातार संवादमा रह्यौं । संविधानसभाबाट संघीय लोकतान्त्रिक गणतन्त्रको संविधान निर्माणको प्रक्रियामा पनि हामीले सहकार्य गर्‍यौं । आजको एकता हठात भएको होइन, झण्डै ४०–४१ वर्षको सहकार्य, संवाद र आन्दोलनको परिणाम हो ।’

प्रचण्डले हालैको जेनजी आन्दोलनले पार्टीभित्र आत्मसमीक्षा गर्नुपर्ने अवस्था सिर्जना गरेको बताएका छन् । उनले युवापुस्ताको भावना र जनताको चाहनाअनुसार आफूहरूलाई सच्याउनु पर्ने आवश्यकतालाई औँल्याउँदै भने, ‘हामीले समीक्षा गरेरै एकताबद्ध बनेका हौं । यो सन्देशसभा आफ्नो कमी कमजोरी खोतल्ने र त्यसलाई सच्याउने प्रतिबद्धता व्यक्त गर्ने अवसर हो । हामी १५ वटा पार्टी एकताबद्ध भएर नेपाली कम्युनिष्ट पार्टी बनेका हौं ।’

प्रचण्डले हजारौं जेनजी युवाहरूले नेकपालाई अभिभावक मानेर पार्टीभित्र भित्रिरहेको उल्लेख गर्दै आफूहरू बदलिएर जनताको सेवामा समर्पित रहने प्रतिबद्धता व्यक्त गरेका छन् । उनले देश कमजोर बनेको अवस्था र विगतका गल्ती–कमजोरीहरूको समीक्षा गर्न आवश्यक रहेको बताए ।