उत्तर कोरियाली नेता किम जोङ उनले आफ्नो व्यक्तिगत सुरक्षाको जिम्मेवारी सम्हाल्ने तीन जना शीर्ष अधिकारीलाई प्रतिस्थापन गर्नुभएको छ । दक्षिण कोरियाली अधिकारीहरूले मङ्गलबार दिएको जानकारीअनुसार यो कदम किममाथि सम्भावित हत्या प्रयासको डर बढेकै कारण चालिएको हुनसक्ने अनुमान गरिएको छ ।

प्योङयाङसँगको सम्बन्ध व्यवस्थापनको जिम्मेवारीमा रहेको सियोलस्थित एकीकरण मन्त्रालयले किमको सुरक्षा सम्हाल्ने तीनवटा राज्य एजेन्सीमा नयाँ प्रमुखहरू नियुक्त गरिएको जनाएको छ । मन्त्रालयका अनुसार यो फेरबदल अक्टोबरमा आयोजित एक सैन्य परेडका क्रममा देखिएको थियो ।

विशेष गरी किमको बडीगार्ड कमान्डमा गरिएको परिवर्तनलाई महत्त्वपूर्ण रूपमा हेरिएको छ । यो कमान्ड ड्रोन आक्रमण वा इलेक्ट्रोनिक हमलाजस्ता आधुनिक खतराविरुद्धको सुरक्षाका उपायहरू सम्हाल्ने जिम्मेवारीमा रहेको छ । एक विज्ञका अनुसार यो परिवर्तन किमले युक्रेनमा रुसको युद्धलाई सहयोग गर्न उत्तर कोरियाली सेना पठाउने निर्णयसँग सम्बन्धित हुनसक्छ ।

कोरिया इन्स्टिच्युट फर नेसनल युनिफिकेसनका विश्लेषक होङ मिनले भन्नुभयो, “किमको सुरक्षा संरचनामा परिवर्तन अक्टोबर २०२४ देखि देखिन थालेको हो, जब उहाँले उत्तर कोरियाली सेना रुसमा तैनाथ गर्नुभयो ।” उहाँका अनुसार सो तैनाथीपछि किम अन्तर्राष्ट्रिय स्तरमा झनै चर्चामा आउनुभएको छ र त्यसकै बीचमा युक्रेनसँग सम्बन्धित पक्षबाट हत्या प्रयास हुनसक्ने चिन्ता किमले गर्नुभएको हुनसक्छ ।

दक्षिण कोरियाको जासुसी एजेन्सीले पनि किमले आफ्नो ज्यानमाथि जोखिम बढेको ठानेर सुरक्षा व्यवस्था कडा बनाएको जानकारी दिएको छ । एजेन्सीका अनुसार किमको कार्यालयले सञ्चार अवरोध गर्न सक्ने र ड्रोन पहिचान तथा नियन्त्रण गर्न सक्ने उपकरणहरू प्राप्त गर्ने प्रयास गरिरहेको छ ।

गत वर्ष किम प्रायः आफ्नी छोरी जु एईसँगै सार्वजनिक रूपमा देखिनुभएको थियो । उहाँले आणविक शक्तिबाट चल्ने पनडुब्बीको निरीक्षणलगायत विभिन्न आधिकारिक गतिविधिहरूमा छोरीलाई सँगै लिएर जानुभएको थियो । विश्लेषकहरूका अनुसार जु एईलाई सम्भावित उत्तराधिकारीका रूपमा अघि सार्ने सङ्केत पनि यसबाट देखिन्छ ।

विश्लेषकहरूले यसै महिनाको अर्को घटनाले पनि प्योङयाङमा सुरक्षा चिन्ता बढाएको बताएका छन् । संयुक्त राज्य अमेरिकाले भेनेजुएलाका राष्ट्रपति निकोलस मदुरोलाई पक्राउ गरेको घटनाले उत्तर कोरियाली नेतृत्वलाई झस्काएको उनीहरूको भनाइ छ ।

उक्त अपरेसनलाई उत्तर कोरियाली नेतृत्वका लागि एक प्रकारको ‘दुःस्वप्न परिदृश्य’ का रूपमा हेरिएको छ । उत्तर कोरियाली नेतृत्वले लामो समयदेखि आफूमाथि अचानक आक्रमण गरिने डर मान्दै आएको छ र त्यसैगरी प्योङयाङले अमेरिकाले आफ्नो शासन हटाउने योजना बनाइरहेको आरोप पनि लगाउँदै आएको छ ।