काठमाडौँ । नेपाली कांग्रेसको विशेष महाधिवेशनबाट निर्वाचित नयाँ नेतृत्व निर्वाचन आयोगमा अद्यावधिक गराउन सभापति गगनकुमार थापा नेतृत्वको टोली सोमबार आयोग पुगेको छ । कांग्रेसको विधानअनुसार विशेष महाधिवेशन सम्पन्न भएपछिका सबै पदाधिकारी विवरण अद्यावधिक गर्नुपर्ने भएकाले आयोगमा निवेदन बुझाइएको हो ।

कार्यवाहक प्रमुख आयुक्त रामप्रसाद भण्डारी र अन्य आयुक्तसँग भेटेर टोलीले छिटो निर्णय गर्न आग्रह गरेको छ । सभापति थापाले सञ्चारकर्मीहरूसँग कुरा गर्दै भने, ‘हामीले विधानअनुसार विशेष महाधिवेशन सम्पन्न गरेका छौं र आवश्यक सबै तथ्य–प्रमाणसहित नेतृत्व परिवर्तनको विवरण आयोगमा बुझाएका छौं । निर्वाचन आयोगले छिटो निर्णय दिने विश्वास राख्छौं ।’

तल्लो तहको समितिसम्मको विवरणसहित आयोग पुगेको टोलीमा वरिष्ठ अधिवक्ता हरिहर दाहाल र यदुनाथ खनाल रहेका थिए । सभापति थापासँगै उपसभापति विश्वप्रकाश शर्मा, पुष्पा भुसाल र अन्य नेताहरू पनि उपस्थित थिए । आयोगले निवेदन स्वीकार गरेको तर अहिलेसम्म औपचारिक प्रतिक्रिया दिएका छैनन् ।

थापाले भने, ‘विशेष महाधिवेशनको निर्णय पार्टीको सर्वोपरी हुने भएकाले यसमा कुनै विवाद हुन सक्दैन । ६ गते उम्मेदवारी मनोनयनको प्रक्रिया सुरु हुन लागेको छ, त्यसैले ढिलोमा पर्सीसम्ममा अद्यावधिक टुङ्गिन्छ भन्ने हाम्रो विश्वास छ ।’ उनले यस अवसरमा पूर्व सभापति शेरबहादुर देउवाको हस्ताक्षर हटाएर नयाँ नेतृत्वको विवरण अद्यावधिक गराउन आयोगमा बुझाएको समेत बताए । थापाले विशेष महाधिवेशनपछि देउवा नेतृत्वको कार्यसमिति भंग भइसकेको जानकारी आयोगलाई पहिले नै गराइसकेको उल्लेख गरे । नेपाली कांग्रेसको नयाँ नेतृत्व अद्यावधिक भएपछि आगामी निर्वाचन र आन्तरिक प्रक्रियाहरू सहज रूपमा अघि बढ्ने अपेक्षा गरिएको छ ।