काठमाडौं । नेपाली कांग्रेसको विशेष महाधिवेशनले नयाँ नेतृत्व चयन गर्दा पार्टी फुटेको नहुने उपसभापति विश्वप्रकाश शर्माले बताएका छन् । महाधिवेशनले नयाँ कार्यसमिति चयन गरेपछि शर्मा र सभापति गगन थापा निर्वाचन आयोग पुगेका थिए र केन्द्रीय कार्यसमितिको विवरण अद्यावधिकका लागि बुझाएका छन् ।

उपसभापति शर्माले सञ्चारकर्मीसँग कुरा गर्दै भने, ‘विशेष महाधिवेशनले नीति र नेतृत्व परिवर्तन गरिसकेको छ । हामीले लिखित तथा मौखिक रूपमा निर्वाचन आयोगलाई जानकारी दिएका छौँ । आधिकारिक रूपमा कुनै प्रश्न उठ्ने अवस्था छैन ।’ उनले पार्टी विभाजनको प्रश्नको जवाफमा भने, ‘कहाँ विभाजन भयो त पार्टी ? नेपाली कांग्रेस एकताबद्ध भएर अगाडि बढ्छ ।’ शर्मा अनुसार, महाधिवेशनमार्फत नेतृत्व परिवर्तन भएपछि पार्टीभित्रको एकता स्पष्ट भएको छ ।

यस अघि बुधबार कांग्रेस केन्द्रीय कार्यसमितिले गगन थापा, विश्वप्रकाश शर्मा र फरमुल्लाह मन्सुरलाई पाँच वर्षका लागि साधारण सदस्यबाट निष्काशन गर्ने निर्णय गरेको थियो । तर त्यसपछि भएको विशेष महाधिवेशनले थापाको नेतृत्वमा नयाँ कार्यसमिति गठन गरेको थियो, जसको उपसभापतिमा विश्वप्रकाश शर्मा र पुष्पा भुसाल चयन भएका छन् । शर्माले भने, ‘महाधिवेशनमा कोही सहभागी भए होलान्, भएनन् होला, त्यो आफ्नो ठाउँमा छ । तर नेपाली कांग्रेसको महाधिवेशनले नेतृत्व र नीतिको अद्यावधिक सुनिश्चित गरेको छ ।’ उक्त घटनाक्रमले स्पष्ट देखाउँछ कि पार्टीको नेतृत्वमा परिवर्तन भए पनि पार्टी फुटेको छैन र आगामी दिनमा कांग्रेस एकताबद्ध रूपमा अघि बढ्ने प्रयासमा छ ।