काठमाडौं । नेपाली कांग्रेसका उपसभापति विश्वप्रकाश शर्माले पार्टीभित्रको विवाद र आन्दोलनको धम्कीले निर्वाचन आयोग प्रभावित नहुने विश्वास व्यक्त गरेका छन् । उनी विशेष महाधिवेशनबाट निर्वाचित भएका हुन् र हाल निर्वाचन आयोगलाई पार्टीको विधान कार्यान्वयनबारे जानकारी गराउन पुगेका थिए ।

उपसभापति शर्माले केहीबेरअघि कांग्रेस केन्द्रीय कार्यालयमा भएको पत्रकार सम्मेलनको सन्दर्भ दिँदै भने, ‘निर्वाचन आयोगले हाम्रो पक्षमा निर्णय दिएन भने देशभर आन्दोलन गर्छौं भन्ने कुरा भर्खरै सुन्नु भयो होला । तर हामी विश्वास गर्छौं कि आयोग यस्तो धम्कीबाट प्रभावित हुँदैन र आफ्नो निष्ठा भुल्दैन ।’

उनीसँगै गगन थापाले पनि निर्वाचन आयोगमा उपस्थित भई पार्टीको विधान कार्यान्वयन सम्बन्धी अवस्था बुझाएका थिए । उनका अनुसार, पार्टीको केन्द्रीय समितिले विशेष महाधिवेशन मागकर्तालाई सम्बोधन नगरेपछि उनीहरूले स्वतन्त्र रूपमा महाधिवेशन आह्वान गर्नु परेको थियो ।

शर्माले आयोगलाई जानकारी दिँदै भने, ‘विशेष महाधिवेशनमार्फत निर्वाचित पदाधिकारी नै पार्टीको आधिकारिक प्रतिनिधि हुन् । कारबाही गर्ने कुरा कानुनसम्मत छैन । हामीले विशेष महाधिवेशन मागकर्ताले विधानअनुसार नै आह्वान गरेको हो । नियमित महाधिवेशनको तालिका नआएको अवस्थामा विशेष महाधिवेशनको प्रावधान अनुसार अघि बढ्नु स्वाभाविक हो ।’

थापाले पनि स्पष्ट पारे, ‘विशेष महाधिवेशन माग भएको ९० दिनभित्र सम्बोधन गर्नुपर्ने व्यवस्था विधानमा छ । १५औं महाधिवेशनको तालिका कार्यान्वयन नभएपछि हामी विशेष महाधिवेशन आह्वान गर्न बाध्य भयौं । कांग्रेसको विधान अनुसार केन्द्रीय कार्यालय महामहामन्त्री मातहत रहने व्यवस्था गरिएको छ र सोहीअनुसार प्रक्रिया अघि बढाइएको छ ।’ विशेष महाधिवेशनको निर्णयले पार्टीमा विवादित कारबाहीको कानुनी पक्षलाई पनि चुनौती दिएको छ । यसले पार्टीभित्रको नेतृत्व र विधान कार्यान्वयनबारे नयाँ बहस सुरु गरेको छ ।