काठमाडौं । नेपाली कांग्रेस (गगन पक्ष) ले आगामी निर्वाचनका लागि १६५ क्षेत्रका उम्मेदवार दुई दिनभित्रै टुंग्याउने तयारी गरेको छ । उपसभापति विश्वप्रकाश शर्माले निर्वाचन आयोगसँग छिटो निर्णय दिन आग्रह गर्दै कांग्रेसको विषयमा आयोगसँग पूर्ण सहकार्य रहने बताए ।

शर्माले शुक्रबार निर्वाचन आयोगमा आयोजित छलफलमा भने, ‘सभापति गगन थापाको अध्यक्षतामा बसेको बैठकले संसदीय बोर्ड गठन गरेर चुनावको तयारी सुरु गरिसकेको छ । हामी दुई दिनभित्रै सबै १६५ क्षेत्रका उम्मेदवार टुंग्याउने गरी काम गरिरहेका छौं । निर्धारित समयमा चुनाव हुन आयोगलाई हाम्रो साथ रहन्छ, तर निर्णय ढिला नगरियोस् ।’ कांग्रेसको नियमित महाधिवेशन नहुँदा विधानको धारा १७ अनुसार विशेष महाधिवेशन गर्नु बाध्यकारी रहेको उनले बताए। अर्की उपसभापति पुष्पा भुसालले पनि विशेष महाधिवेशनको निर्णय अनुसार दल अद्यावधिक गर्न आयोगसँग आग्रह गरेकी छन् ।

विशेष महाधिवेशनको मागलाई लिएर हस्ताक्षर फिर्ता हुने विषयमा विवाद छ । शर्माले आयोगमा जानकारी गराए अनुसार, विशेष महाधिवेशन माग गर्ने ९० जनामध्ये हालसम्म २९ जनाले मात्रै हस्ताक्षर फिर्ता गरेका छन् । यसअघि शेरबहादुर देउवा पक्षले भने ८८५ जनाले हस्ताक्षर फिर्ता गरेको दाबी आयोगमा पेश गरेको थियो। शर्माले जवाफ दिँदै भने, ‘कसैले हस्ताक्षर फिर्ता गरे पनि त्यसलाई अन्यथा बुझ्नु हुँदैन । विधि र समयअनुसार मात्र फिर्ता मान्य हुनेछ। माघ ६ गते प्रतिनिधि सभाका लागि उम्मेदवारी दर्ता छ, त्यसअघि फिर्ता भए मात्र मान्य हुन्छ । त्यसपछि फिर्ता भनेको दाबी मान्य हुँदैन ।’

उपसभापति शर्माले स्पष्ट पारे, ‘हाम्रो विशेष महाधिवेशनको समयावधिभित्र फिर्ता गरिएको संख्या २९ जना हो। गाउँ फर्किसकेपछि फिर्ता भनेकालाई मान्न नमिल्ने र दाबी खारेज हुने नियम छ ।’ यो विवाद कांग्रेसभित्रको आन्तरिक संघर्ष र आगामी निर्वाचन तयारीलाई लिएर आयोगसँगको समन्वयमा के कस्तो असर पार्नेछ, भन्ने विषयमा राजनीतिक विश्लेषकहरू ध्यान दिइरहेका छन् ।