काठमाडौं । नेपाली कांग्रेसको दुई पक्षको उपस्थितिले निर्वाचन आयोग कार्यालय परिसरमा तनाव सिर्जना भएको छ । भर्खरै सम्पन्न भएको विशेष महाधिवेशनबाट निर्वाचित गगन थापा नेतृत्वको कांग्रेससँग छलफल चलिरहेका बेला सानेपाबाट पत्रकार सम्मेलन आयोजना गरी पुनः निर्वाचन आयोग पुगेको देउवा पक्षीय कांग्रेसका नेता–कार्यकर्ताबीच विवादको अवस्था सिर्जना भएको हो ।

जसका कारण अहिले आयोग कार्यालय परिसरमा उच्च सुरक्षा सतर्कता अपनाइएको छ । दुवै पक्षका कांग्रेसले आफू आधिकारिक भएको दावी गर्दै आयोगमा निवेदन दिएका थिए । सोही निवेदनका आधारमा आयोगले आज दुबै समूहसँग छलफल गरेको थियो । आयोगले पहिलो चरणमा शेरबहादुर देउवा नेतृत्वको कांग्रेससँग पार्टीको आधिकारिकता, चुनाव, चिन्ह र झण्डका विषयमा छलफल गरेको थियो । त्यसपछि उक्त पक्ष आफ्नो पार्टी कार्यालय सानेपा फर्किएको थियो ।

देउवा पक्षीय कांग्रेससँगको छलफलपछि गगन थपा नेतृत्वको कांग्रेस नेता–कार्यकर्ता आधिकारिकता दावीसहित आयोगमा धलफल गर्न पुगेका थिए । उनीहरुले आफूलाई आधाकारितकता दिनुपर्ने दावी गर्दै धर्ना समेत दिएका थिए । सानेपामा पत्रकार सम्मेलनपछि देउवा नेतृत्वको कांग्रेस नेता–कार्यकर्ता पुनः आयोग पुगेपछि तनावको अवस्था सिर्जना भएको हो । सानेपाको पत्रकार सम्मेलनमा कांग्रेस कार्यवाहक उपसभापति पूर्णबहादुर खड्काले आयोगले आफूहरुलाई आधिकारिकता नदिए देशभर आन्दोलन गर्ने चेतावनी दिएका थिए ।