काठमाडौं । निर्वाचन आयोगले मेडिकल व्यवसायी दुर्गा प्रसाईंलाई अनुसन्धानको दायरामा ल्याउन निर्देशन दिएको छ । कांग्रेस विशेष महाधिवेशन पक्षधरलाई मान्यता दिएको विषयलाई लिएर प्रसाईंले भ्रामक सूचना प्रवाह गरेको भन्दै आयोगले प्रहरी प्रधान कार्यालयको साइबर ब्युरोलाई आइतबार पत्र पठाएर अनुसन्धानको दायरामा ल्याउन निर्देशन दिएको हो ।

प्रसाईंले आयोगलाई पैसा बुझाएर दलको आधिकारिकता लिएको दाबीसहित भ्रामक सूचना प्रवाह गरेको आयोगको दाबी छ । प्रसाइँले आइतबार आफ्नै निवास भक्तपुरमा गगन थापा पक्षले ५२ करोड दिएर आयोगबाट मान्यता पाएको आरोप लगाएका थिए । भ्रम फैलाएको भन्दै आयोगको आइतबार बसेको बैठकले उनलाई आवश्यक कानूनी कारबाही गर्न पत्राचार गरेको हो ।

आयोग उच्च स्रोतले भन्यो, ‘दुर्गा प्रसाईले शनिबार पत्रकार सम्मेलन गरेर विभिन्न व्यक्तिलाई निराधार आरोप लगाएको आयोगमा जानकारी प्राप्त भयो । निर्वाचनमा मुखैमा यस्ता निराधार आरोप लगाउनेलाई साइबर कानुन अनुसार आवश्यक कारबाहीका लागि आयोगले आइतबार निर्णय गरेर पत्राचार गरेको छ ।’