जेनेभा। संयुक्त राष्ट्रसङ्घका मानव अधिकार प्रमुखले शुक्रबार अमेरिकी अधिकारीहरूले आप्रवासीमाथि पछिल्लो समय हुने गरेका ‘नियमित दुव्र्यवहार’ प्रति आश्चर्य व्यक्त गर्दै वासिङ्टनलाई ‘परिवारलाई टुक्राउने अभ्यास अन्त्य गर्न’ आग्रह गर्नुभएको छ।

संयुक्त राष्ट्रसङ्घका मानव अधिकार प्रमुख भोल्कर टर्कले ‘आप्रवासी र शरणार्थीहरूको अमानवीय चित्रण र दुव्र्यवहार संयुक्त राज्य अमेरिकाका लागि नसुहाउने बताउनुभएको छ। उहाँले अमेरिकाको आप्रवासी नीति र प्रवर्तन अभ्यासहरूले मानवीय गरिमा र उचित प्रक्रियाको अधिकारको सम्मान गरेको सुनिश्चित गर्न आग्रह गर्नुभयो ।

उहाँले भन्नुभयो, “म आप्रवासी र शरणार्थीहरूप्रति अमेरिकाको अहिलेको नियमित दुव्र्यवहार र अपमानबाट चकित छु,” उहाँले एक विज्ञप्तिमा बताउनुभएको छ।”

उहाँले प्रश्न गर्नुभयो, “उनीहरूको आत्मसम्मान र हाम्रो साझा मानवताको चिन्ता कहाँ छ?” राष्ट्रपति डोनाल्ड ट्रम्पको रिपब्लिकन प्रशासनले देशभरि लाखौं अवैध आप्रवासीलाई देश निकाला गर्न आफ्नो अभियानलाई दबाब दिइरहेको छ। डेमोक्र्याटिक नेतृत्वको मिनियापोलिसमा हजारौँ आप्रवासन र भन्सार प्रवर्तन (आइसिई) सदस्यहरू तैनाथ गरिएको छ ।

डेमोक्र्याटिक र मिनियापोलिसका स्थानीय अधिकारीहरूले विशाल आप्रवासन कारबाहीमा बिहीवार पाँच वर्षीय बालकलाई हिरासतमा लिएकोमा उहाँले आक्रोश व्यक्त गर्नुभयो ।

जनवरी ७ मा सङ्घीय सुरक्षा अधिकारीहरूले अमेरिकी नागरिक रेनी गुडलाई गोली हानेर हत्या गरेपछि मिनियापोलिस बढ्दो तनावपूर्ण प्रदर्शनले प्रभावित बनेको छ, जबकि ट्रम्प र उहाँका अधिकारीहरूले गोली हान्ने कार्यलाई वैध आत्मरक्षाको रूपमा बचाउ गरेका छन् ।

संयुक्त राष्ट्रसङ्घको मानव अधिकार उच्चायुक्तले अमेरिकी आप्रवासन र अन्य सदस्यहरूले ठूलो मात्रामा प्रवर्तन अभियानको प्रयोगको निन्दा गर्दै बारम्बार अनावश्यक वा असङ्गत बल प्रयोग गरिरहेको बताउनुभएको छ।