काठमाडौँ । राष्ट्रिय प्रजातन्त्र पार्टी (राप्रपा) का नेता एवं काठमाडौँ निर्वाचन क्षेत्र नम्बर ५ का उम्मेदवार कमल थापाले हिन्दु राष्ट्र र राजसंस्था पुनः स्थापना नभईकन राप्रपा सत्तामा नजाने बताएका छन् । आज (शनिवार) काठमाडौँमा आयोजित एक कार्यक्रमलाई सम्बोधन गर्दै उनले यस्तो बताएका हुन् ।

उनले सत्ता केन्द्रित राजनीति राप्रपाले नगर्ने पनि स्पष्ट पारे । उनले राजा मतदाता भएको निर्वाचन क्षेत्रबाट विजयी हुनुले देश तथा विदेशमा पनि महत्वपूर्ण सन्देश जाने जिकिर गरे । उनले काठमाडौँ क्षेत्र नम्बर ५ मा हिन्दुराष्ट्र चाहने, राजसंस्था चाहने, राष्ट्रवादीहरूको धेरै ठुलो संख्या रहेको बताए । राजतन्त्रवादी जनमतलाई भोटमा बदल्न सके विजयी निश्चित रहेको बताए ।

उनले भने ‘हिन्दुराष्ट्र र राजसंस्था पुनः स्थापना नभईकन हामी सत्तामा जानु छैन । सत्ता केन्द्रित राजनीति गर्ने छैनौँ । यो सन्देश हामीले प्रत्येक नेपालीलाई दिन सक्नुपर्छ । स्वयं राजा मतदाता भएको निर्वाचन क्षेत्रबाट निर्वाचित भएर जाँदा देश विदेशमा एउटा बलियो सन्देश जान्छ । त्यसका लागि हामी निरन्तर रूपमा खटिरहेका छौँ । काठमाडौँ क्षेत्र नम्बर ५ मा हिन्दुराष्ट्र चाहने, राजसंस्था चाहने, राष्ट्रवादीहरूको धेरै ठुलो संख्या छ । जनमत छ । त्यो जनमतलाई भोटमा परिणत गराउनसके फागुन २१ गतेको निर्वाचनमा हाम्रो विजय अवश्यम्भावी छ ।’ उनले भ्रष्ट व्यवस्था र भ्रष्ट शासकबाट मुक्ति चाहने भए राप्रपालाई विजयी गराइ काम गर्ने मौका दिन आग्रह गरे ।