इस्लामाबाद । दबाब, साइबर दुर्व्यवहार र गिरफ्तारी वारेन्टका बाबजुद पाकिस्तानकी चर्चित मानव अधिकारवादी वकिल इमान मजारीलाई चुप गराउन सकिएको छैन । उहाँले जेल सजायले समेत आफ्नो सङ्कल्प कमजोर नपार्ने स्पष्ट पार्नुभएको छ ।

जातीय अल्पसङ्ख्यक, मानहानिको आरोप खेपिरहेका पत्रकार र ईश्वरनिन्दाको अभियोगमा परेका व्यक्तिहरूको कानुनी रक्षा गर्दै ३२ वर्षीया मजारीले पाकिस्तानका सबैभन्दा संवेदनशील विषयहरू उठाउँदै व्यापक चर्चा कमाउनुभएको हो । तर उहाँको पहिचान बढ्दै जाँदा ‘साइबर आतङ्कवाद’ र ‘घृणापूर्ण भाषण’ जस्ता आरोप पनि थपिँदै गएका छन् ।

शनिबार इस्लामाबादको एक अदालतले उहाँ र उहाँका पति तथा सहकर्मी वकिल हादी अली चथालाई ‘राज्यविरोधी’ सामाजिक सञ्जाल सामग्री पोस्ट गरेको आरोपमा १० वर्षको जेल सजाय सुनाएको छ । अदालतका कागजातअनुसार उहाँहरूले अत्यन्त आपत्तिजनक सामग्री फैलाएको ठहर गरिएको छ । अभियोगको सुनुवाइका लागि अदालत पुग्ने क्रममा दम्पतीलाई पुनः पक्राउ गरिएको भोलिपल्ट सजाय सुनाइएको हो ।

“यस देशमा सत्य बोल्नु गाह्रो देखिन्छ, तर हामीले यो बाटो रोज्दा आउने परिणामका लागि आफूलाई तयार पारेका थियौँ”, मजारीले अदालतमा भन्नुभयो, “हामी पछाडि हट्नेछैनौँ ।”

उहाँको अडानका कारण उहाँलाई दिवङ्गत मानव अधिकार वकिल आसमा जहाँगीरसँग तुलना गरिन्छ, जसलाई मजारीले ठूलो सम्मान र सौभाग्यको विषय भएको बताउनु भएको छ । मजारी पाकिस्तानकी पूर्व मानव अधिकारमन्त्री शिरीन मजारीकी छोरी हुनुहुन्छ । उहाँका दिवङ्गत पिता देशको प्रतिष्ठित बालरोग विशेषज्ञ हुनुहुन्थ्यो ।

मजारीकी आमा शिरीनले भन्नुभयो, “मेरी छोरीले सधैँ बेदखल र सीमान्तकृतहरूको पक्ष लिइन् । त्यसैले परिवारले जोखिम झेल्नुपरे पनि म उनलाई लिएर गर्व गर्छु ।” उहाँले मानव अधिकार उल्लङ्घनविरुद्ध बोल्नेहरूलाई पीडित बनाइने प्रवृत्तिप्रति चिन्ता व्यक्त गर्नुभयो ।

निःशुल्क कानूनी सेवा दिने वकिलका रूपमा मजारीले बलुच समुदायका जबरजस्ती बेपत्ता पारिएका व्यक्तिहरू, बलुच कार्यकर्ता महराङ बलुच, ईश्वरनिन्दाको आरोप खेपिरहेका व्यक्ति तथा दमनमा परेका अफगान नागरिकहरूको पक्षमा अदालतमा प्रतिनिधित्व गर्नुभएको छ । हालैका संवैधानिक परिवर्तन र हतारमा बनेका कानूनहरूले पाकिस्तानलाई अझ कडा राज्य नियन्त्रणतर्फ धकेलेको आलोचकहरू बताउँछन् ।

पत्रकार मजारी असद अली तूरका अनुसार मजारी ‘राज्यका लागि निरन्तर चुनौती’ हुनुहुन्छ, किनकि उहाँले समाजको किनारामा परेका सबैको प्रतिनिधित्व गर्नुहुन्छ । राम्रो परिवार पृष्ठभूमि हुँदाहुँदै पनि उहाँले सक्रियताको बाटो रोजेर आफ्नो जीवन झन् कठिन बनाएको तूरको भनाइ छ ।

एडिनबर्ग विश्वविद्यालयकी स्नातक मजारीले महिलाको सहभागिता कम रहेको समाजमा यौनवादी टिप्पणी र डिजिटल दुर्व्यवहारसमेत सहनुपरेको छ । सन् २०२५ मा वर्ल्ड एक्सप्रेसन फोरमले उहाँलाई साहस, अखण्डता र कानुनी शासनका लागि गरेको योगदानको कदर गर्दै ‘यङ इन्स्पिरेसन अवार्ड’ प्रदान गरेको थियो । संयुक्त राष्ट्रसङ्घका विशेष प्रतिवेदकले पनि उहाँविरुद्धका मुद्दालाई कानुनी प्रणालीको दुरुपयोगको उदाहरण भनेका थिए ।

जनवरी २०२६ मा पाकिस्तानको सैन्य प्रवक्ताले पत्रकार सम्मेलनमा मजारीको सामाजिक सञ्जाल पोस्ट उद्धृत गर्दै मानव अधिकारको आडमा आतङ्कवाद बढाउने आरोप लगाएका थिए । यस्ता आरोपका बाबजुद मजारीले पतिसँगै आफ्नो सङ्घर्ष जारी राख्ने बताउनुभएको छ ।

“हामी गैरकानुनी रूपमा थुनिने पहिलो व्यक्ति होइनौँ”, उहाँले भन्नुभयो, “हामी लडिरहनेछौँ ।”