काठमाडौं । प्रतिनिधिसभाको दोस्रो मध्यावधि निर्वाचन आउन करिब एक महिना बाँकी छ । उम्मेदवारहरू मतदाताको घरदैलोमा पुगिरहेका छन् । मतदाताहरूसँग मत माग्दै ‘देश बनाउने’ आश्वासन बाँडिरहेका छन् । यस्तो आश्वासन सबैभन्दा बढी दिने दल रास्वपा हो ।

सोही दलबाट काठमाडौं–७ मा गणेश पराजुली उम्मेदवार छन् । अघिल्लोपटक पनि उनी यही क्षेत्रबाट निर्वाचित थिए । यसपटक फेरि मतदाताको घरदैलोमा मत माग्दै जाँदा उनलाई मतदाताले कसरी लिन्छन् ? हामीले पछ्याएका थियौँ ।

त्यस क्रममा उनले नेपाल भाषा खत्र्याकखुत्रुक बोल्दै सावित्री श्रेष्ठ नामकी मतदातासँग मत मागिन् । आफूभन्दा पनि पार्टी सभापति रवि लामिछानेदेखि वरिष्ठ नेता बालेन्द्र शाहलाई चिन्नुहुन्छ ? भन्दै मत मागेका उनलाई सावित्रीले रणनीतिक रूपमा मुन्टो हल्लाइन् ।

मनोवैज्ञानिकहरूका अनुसार मतदाता प्रष्ट रूपमा कुनै उम्मेदवारप्रति नखुल्दा टार्न त्यसो गर्दछन् । तैपनि गणेशले यसपटक पनि मत दिन आग्रह गरिरहे । घरदैलोमा रहेका केहीले घण्टीमा भोट दिनुपर्ने सन्दर्भ उप्काए । उनले हाँस्दै जवाफ दिइन्– ‘घण्टी त पूजा गर्नेबेला चाहिन्छ ।’

एमाले अध्यक्ष केपी शर्मा ओलीसँग रास्वपाका वरिष्ठ नेता बालेन्द्र शाह झापा–५ मा चुनावी प्रतिस्पर्धामा छन् । यतिबेला झापाले देशको ध्यान खिचेको छ । यस सन्दर्भ पनि कोट्याउँदै ओली र उनको दलको चिह्न सूर्यको प्रसङ्ग जोडेका थियौँ ।

त्यसबेला उनले भनिन्, ‘सूर्य पनि चाहिन्छ । घण्टी पनि चाहिन्छ ।’

सावित्री एक प्रतिनिधि मतदाता हुन् । उनीजस्तै थुप्रै मतदाता आगामी प्रतिनिधिसभा निर्वाचनमा कसलाई मत दिने ? निर्णित छैनन् ।