काठमाडौं । राष्ट्रिय स्वतन्त्र पार्टी (रास्वपा)का नेता शिशिर खनालले सरकारले जस्तो कानुन चाहन्छ, त्यस्तै बन्ने गरेको बताएका छन् ।

पूर्वसांसदसमेत रहेका उनले प्रतिपक्षी दलका सांसदहरूको कानुन निर्माणमा एकदमै सीमित भूमिका हुने गरेको बताए । कार्यपालिकालाई कानुन निर्माणको प्रारम्भिक चरणमा अधिक जिम्मेवारी हुँदा त्यस्तो भएको उनको अनुभव छ ।

‘कानुन निर्माणका सबै प्रक्रिया मन्त्रालयबाट सुरु हुन्छन् । मोटामोटी संसद्मा आएपछि संशोधनका प्रयास हुन्छन् तर बहुमत प्राप्त दलका नेता प्रधानमन्त्री बन्छ र त्यो हुनाले सरकारले जस्तो जस्तो चाहन्छ, त्यस्तैत्यस्तै खाले कानुन बन्छन्,’ उनले भने, ‘प्रतिपक्षीय सांसदहरूको कानुन निर्माणमा एकदमै भूमिका लिमिटेड हुँदो रहेछ ।’

उनले कुनै दलले स्पष्ट जनादेश पाएनन् भने घोषणापत्र कार्यान्वयन गर्न नसकिने पनि बताए । त्यसो हुनाले उनले मतदातासँग कुनै दललाई स्पष्ट बहुमत दिन आग्रह गरे ।