मोरङ। कोशी प्रदेशसभाको आठौँ अधिवेशनको पहिलो बैठक आज विराटनगरस्थित वीरेन्द्र सभागृहमा सञ्चालन भयो ।

सभामा सभामुख अम्बरबहादुर विष्टले कोशी प्रदेशका प्रदेश प्रदेश प्रमख परशुराम खापुङबाट प्राप्त अधिवेशन आह्वानसम्बन्धी पत्र एवं प्रदेश मन्त्रिपरिषद् गठनसम्बन्धी पत्रको व्यहोरा वाचन गरेर सदनलाई जानकारी दिनुभयो ।

यसैगरी उहाँले प्रदेशसभाको सदस्यको स्थान रिक्त सम्बन्धमा जानकारी गराउनुभयो । यस्तै, निर्वाचन आयोग नेपालबाट पार्टी एकीकरण सम्बन्धमा प्राप्त पत्र वाचन गर्नुभयो ।
सभामा नेपाली कांग्रेस संसदीय दलका नेता उद्धव थापाले आगामी फागुन २१ गते हुने प्रतिनिधिसभा निर्वाचनलाई सफल बनाउन सबै दल लाग्नुपर्ने बताउनुभयो । उहाँले मुलुकलाई समृद्धि, सुशासन, भ्रष्टाचारको अन्त्यका लागि दलहरूबीच एकताको विकल्प नरहेको धारणा राख्नुभयो ।

राष्ट्रिय प्रजातन्त्र पार्टी, संसदीय दलका नेता प्रेमराज थाङसुहाङले कोशी प्रदेश राष्ट्रियसभाको निर्वाचनको मतदानका दिन आफू प्रदेश बाहिर भए पनि आफ्नो मत खसेको जानकारी सञ्चारमाध्यमबाट प्राप्त भएकामा आपत्ति जनाउनुभयो ।

नेपाली कम्युनिष्ट पार्टी, संसदीय दलका नेता इन्द्रबहादुर आङवोले सुशासन कायम राख्न भूमिका निर्वाह गर्नुपर्नेमा जोड दिनुभयो । नेकपा (एमाले) संसदीय दलका उपनेता तीलकुमार मेयाङवोले मुलुकमा लोकतन्त्रलाई सुदृढ गर्न दलहरूबीच एकताबद्ध हुनु जरुरी रहेको धारणा राख्नुभयो ।

प्रदेशसभाको अर्को बैठक माघ २६ गते दिनको १ः०० बजे बस्नेछ ।