काठमाडौं । राष्ट्रिय स्वतन्त्र पार्टी (रास्वपा)का उम्मेदवारहरूले निर्वाचन जिते सम्बन्धित जिल्लामा सभापति रवि लामिछाने र भावी प्रधानमन्त्रीका प्रस्तावित उम्मेदवार बालेन्द्र शाह (बालेन)लाई ल्याउने वाचा गर्छन् ।

यस्तो वाचा गर्नेहरू पार्टी उपसभापतिसमेत रहेका काठमाडौं–९ का उम्मेदवार डोलप्रसाद अर्याल (डीपी), चितवन–३ कि उम्मेदवार सोविता गौतमदेखि समानुपातिक उम्मेदवार रीमा विश्वकर्मासम्म छन् ।

लामिछाने र शाहलाई चुनाव क्षेत्रमा ल्याउने वाचा गरेको प्रसङ्गलाई लिएर आलोचकहरू भने खिसी गर्छन् । हुन पनि चुनावमा उम्मेदवारहरूले मतदातासँग जनसरोकारका मुद्दा सम्बोधन गर्ने वाचा गर्छन् । तर, रास्वपा उम्मेदवारहरू भने नेता ल्याउने वाचा गर्छन् ।

यही मेसोमा शुक्रबार सभापति लामिछानेलाई एक जनाले सोधे, ‘सागर ढकाल र गोविन्दजीलाई जिताएर पठायौँ भने ६/६ महिनामा गुल्मी आउने वाचा तपाईंले पनि गर्न सक्नुहुन्छ ?’

लामिछानेले जवाफ दिए, ‘त्यति ढिला गर्ने ?’

गुल्मी–१ मा रास्वपाका सागर ढकाल र गुल्मी – २ मा गोविन्द पन्थी उम्मेदवार छन् । दुवैलाई गुल्मेली जनताले निर्वाचित गरे छिट्टै गुल्मी जाने लामिछानेले बताएका हुन् ।

उनले गुल्मेली जनताले इतिहासमै पहिलोपटक राम्रा उम्मेदवार पाएको भन्दै ढकाल र पन्थीको प्रशंसा गरे । रविले प्रशंसा गर्दा ढकाल भने घरिघरी हाँसेको देदेखिन्थे ।