एडिस अबाबा । संयुक्त राष्ट्रसङ्घका महासचिव एन्टोनियो गुटेरेसले अफ्रिका आज विश्वका गम्भीर चुनौतीहरूलाई दृढता, सिर्जनशीलता र सहनशीलतासहित सामना गरिरहेको बताएका छन् ।

इथियोपियाको राजधानी एडिस अबाबामा आयोजित अफ्रिकी सङ्घको शिखर सम्मेलनका क्रममा उनले सञ्चारकर्मीसँग कुरा गर्दै अफ्रिकी मुलुकहरूले विकास, शान्ति र स्थायित्वका क्षेत्रमा महत्वपूर्ण प्रयास गरिरहेको उल्लेख गरे ।

महासचिवले अफ्रिकामा क्षेत्रीय एकता, स्वच्छ ऊर्जामा लगानी तथा पूर्वाधार विकासमा प्रगति भइरहेको बताए । साथै शान्ति र सुरक्षा, आर्थिक न्याय तथा जलवायु सम्बन्धी कार्यमा सहकार्य अझ सुदृढ गरिने प्रतिबद्धता व्यक्त गरे ।

उनले केही क्षेत्रहरूमा बहुआयामिक द्वन्द्व र जटिल परिस्थिति कायम रहेको उल्लेख गर्दै सुडान, कङ्गो, साहेल क्षेत्र तथा अफ्रिका सिङ्गो क्षेत्रमा शान्ति स्थापना गर्न थप अन्तर्राष्ट्रिय सहयोग आवश्यक रहेको बताए ।

आर्थिक पक्षमा उनले अफ्रिका विश्वका तीव्र गतिमा उदीयमान अर्थतन्त्रहरूमध्ये एक भए पनि वित्तीय संरचनामा रहेको असमानताले उद्योग, शिक्षा, स्वास्थ्य र रोजगारी सिर्जनामा अवरोध पुर्‍याइरहेको धारणा व्यक्त गरे । औपनिवेशिक इतिहासका प्रभावहरू अझै पनि आर्थिक संरचनामा देखिने उनले बताए ।

जलवायु परिवर्तनका सन्दर्भमा अफ्रिकाको योगदान न्यून भए पनि सूखा, बाढी, खाद्य सङ्कट र अत्यधिक गर्मी जस्ता समस्याबाट सबैभन्दा बढी प्रभावित भएको उनले उल्लेख गरे । आवश्यक सहयोग प्राप्त भए अफ्रिका विश्वस्तरको नवीकरणीय ऊर्जा केन्द्र बन्न सक्ने उनको भनाइ थियो ।