काठमाडौं– गोरखाको मनकामना मन्दिर दर्शन गरेर फर्किँदै गरेको माइक्रो बस शनिबार राति दुर्घटना हुँदा ७ जना भारतीय नागरिकको घटनास्थलमै मृत्यु भएको छ ।

मृतक दुई जना महिला र पाँच जना पुरुष रहेका छन् । उनीहरूको सनाखत हुन बाँकी रहेको गोरखाका ट्राफिक प्रहरी प्रमुख सुरज अर्यालले बताए।

उनका अनुसार दुर्घटनामा ८ जना घाइते भएका छन् । उनीहरूको उद्धार गरिएको छ । घाइतेमध्ये ७ जनाको आँबुखैरेनीस्थित अस्पतालमा उपचार भइरहेको छ भने गम्भीर घाइते अर्का एकको थप उपचारका लागि भरतपुर रिफर गरिएको छ ।

अन्य घाइतेहरूको अवस्था सामान्य रहेको छ । घटनास्थलमा रहेका केही शव निकाल्न सशस्त्र प्रहरीको टोली खटिएको थियो । प्रदेश ००६ ख ८४३० नम्बरको माइक्रो बस राति करिब ८ बजेतिर दुर्घटना भएको हो ।

गाडी सडकबाट करिब १५० देखि २०० मिटर तल खसेको छ । दुर्घटनाको कारण ओरालो बाटोमा गाडी तातेर ब्रेक फेल हुँदा भएको हुन सक्ने अनुमान गरिएको छ ।