काठमाडौँ । काठमाडौं महानगरपालिका–१२ अन्तर्गतको भोटेबहाल क्षेत्रमा बसको ठक्करबाट दुई पैदल यात्रीको मृत्यु भएको छ।

मृत्यु हुनेमा टेकु नजिकै बस्दै आएका भारतीय नागरिक ४५ वर्षीय पदम उपाध्याय र ३७ वर्षीय सतिसकुमार कुसवाह रहेको उपत्यका ट्राफिक प्रहरी कार्यालयले जानकारी दिएको छ।

शुक्रबार साँझ कालिमाटीबाट त्रिपुरेश्वरतर्फ जाँदै गरेको प्रदेश–३–०१–००५ ख ९२९८ नम्बरको बसले ठक्कर दिँदा दुवैजना गम्भीर घाइते भएका थिए। उपचारका लागि लगिएको ट्रमा सेन्टरमा गएराति दुवैको मृत्यु भएको उपत्यका ट्राफिक प्रहरी कार्यालयका एसपी नरेश सुवेदीले बताए।

बस चालक दोलखा घर भई कपनमा बस्ने ३५ वर्षीय मानबहादुर बस्नेतलाई प्रहरीले नियन्त्रणमा लिएको छ। घटनाबारे प्रहरी वृत्त कालिमाटीले थप अनुसन्धान गरिरहेको छ।