काठमाडौं । जेन–जी आन्दोलन (भदौ २३-२४) का घटनाबारे बयान दिने क्रममा जिल्ला प्रशासन काठमाडौंका तत्कालीन प्रमुख जिल्ला अधिकारी छविलाल रिजाल ले आफूले ‘घुँडाभन्दा तल लक्षित रबरको गोली’ चलाउन मात्र मौखिक आदेश दिएको स्पष्ट पारेका छन्।

तर, अन्तिम बल अर्थात् सिधै गोली चलाउने आदेश भने आफूले कहिल्यै नदिएको उनको दाबी छ।

आयोगलाई दिएको बयान प्रतिवेदनमा उद्धृत छ। रिजालले तनावपूर्ण अवस्थाको क्रममा प्रहरीको रेडियो सेटमार्फत तत्कालीन प्रहरी महानिरीक्षक र काठमाडौं उपत्यका प्रहरी कार्यालय का निमित्त प्रमुखबाट ‘आवश्यकता अनुसार अवस्था नियन्त्रणमा लिन फायर खोल्नु’ भन्ने आदेश आएको सुनेका थिए।

‘मबाट रबरको गोली प्रयोग गर्न निर्देश भए पनि प्रत्यक्ष फायर खोल्ने आदेश दिइएको थिएन। स्थिति बिग्रिँदै जाँदा माथिल्ला प्रहरी अधिकारीहरूबाट फायर खोल्नू भनेर आदेश आएको सुनेको मात्र हुँ।’रिजालले बयानमा भनेका छन्।