काठमाडौं। भदौ २३ र २४ का हिंसात्मक घटनाको छानबिनका लागि गठित गौरीबहादुर कार्की नेतृत्वको जाँचबुझ आयोगले काठमाडौंभित्र रहेका आलिसान गुम्बासँगै देशभरका चर्च र मदरसामा हुने गतिविधि प्रभावकारी रूपमा निगरानी गर्न सरकारलाई सुझाव दिएको छ।

आयोगले भदौ २३ र २४ को आन्दोलनमा टिओबी समूहको संलग्नताबारे प्रतिवेदनमा उल्लेख गरेको छ, तर उनीहरूमाथि कुनै प्रकारको कारबाही सिफारिस भने गरेको छैन। प्रतिवेदनमा काठमाडौं उपत्यकाका डाँडामाथि निर्माण गरिएका ठूला र आकर्षक गुम्बाहरूको सरकारले नियमित अनुगमन गर्नुपर्ने आवश्यकता औंल्याइएको छ।

यससँगै मुस्लिम समुदायका बालबालिका अध्ययन गर्ने मदरसाहरू र क्रिश्चियन समुदायका चर्चहरूमा आउने फण्डको स्रोत तथा ती संस्थाहरूमा भइरहेका गतिविधिहरूको समेत कडा निगरानी आवश्यक रहेको आयोगले सुझाएको छ। आयोगका अनुसार यस्तो गतिविधिले राष्ट्रिय सुरक्षामा प्रत्यक्ष प्रभाव पार्ने भएकाले मुलुकको गुप्तचर प्रणाली बलियो बनाउनु तत्काल आवश्यक छ।