काठमाडौं । राष्ट्रिय सतर्कता केन्द्रले ६३२ जना कर्मचारीलाई कारबाही गर्न सम्बन्धित कार्यालय प्रमुखलाई सिफारिस गरेको छ।

केन्द्रले विभिन्न कार्यालयमा छड्के अनुगमन गरी ती कर्मचारीलाई कारबाही गर्न सिफारिस गरेको केन्द्रका प्रवक्ता नारायणप्रसाद भट्टले जानकारी दिए। उनीहरूलाई निजामती सेवा ऐन, २०४९ को दफा ५५ अनुसार सम्बन्धित कार्यालयले चेतावनी पत्र दिने र सोको अभिलेख कार्यालयमा राखिने जनाइएको छ।

यसैगरी, ऐनमा दुई पटकसम्म चेतावनीमा परिसकेका कर्मचारीलाई विभागीय कारबाही गर्ने व्यवस्था छ। कार्यालय समयमा अनुपस्थित रहने कर्मचारीलाई कारबाहीका लागि सिफारिस गरिएको भट्टले बताए। केही कर्मचारीलाई कारबाही गरिएको जानकारी केन्द्रमा प्राप्त भइसकेको छ।

केन्द्रले सातै प्रदेशका जनसम्पर्क धेरै हुने जिल्लाका कार्यालयमा अनुगमन गरिरहेको जनाएको छ।