काठमाडौं । राष्ट्रिय प्रजातन्त्र पार्टी (राप्रपा)को संसदीय दलका नेता ज्ञानेन्द्र शाहीले रास्वपा सांसद खगेन्द्र सुनारलाई प्रधानमन्त्री कार्यालयमा धर्ना बस्न सुझाव दिएका छन् ।

सिन्धुलीका युवक श्रीकृष्ण विकको प्रहरी कार्यालयको हिरासतमा भएको मृत्युलाई जातीय विभेदको उपजको रूपमा अथ्र्याउँदै रास्वपा सांसद सुनार जिल्ला प्रशासन कार्यालय सिन्धुलीको गेट अगाडि धर्ना बसेको प्रसङ्गमा शाहीले प्रधानमन्त्री कार्यालयमा बस्ने सुझाएका हुन् ।

प्रधानमन्त्री बालेन्द्र शाह छन् । उनी सुनारकै दलको वरिष्ठ नेता हुन् । यस्तोमा शाहीले सीडीओ कार्यालय नभई आफ्नै पार्टीका प्रधानमन्त्री बालेनको कार्यालयअघि धर्नामा बस्नु भनेका हुन् ।

‘खगेन्द्र सुनार माननीयज्यूलाई म के भन्न चाहन्छु भने जातीय विभेद भएको होला तपाईं सीडीओ कार्यालयमा होइन कि प्रधानमन्त्री कार्यालयमा पुग्नुहोस् । सबैभन्दा राम्रो त्यो हुन्छ,’ शाहीले भने ।

अन्तरजातीय विवाह गरेका श्रीकृष्ण केही दिनअघि सिन्धुलीको खुर्कोट इलाका प्रहरी कार्यालयमा सर्टको पासो लगाएको अवस्थामा फेला परेको प्रहरीको दाबी थियो ।

उनलाई उपचारका लागि अस्पतालमा लाँदा मृत्यु भएको प्रहरीको जवाफ छ । यस्तोमा उनलाई दलित भएकै कारण कुटपिट गरेर प्रहरी हिरासतमै हत्या गरेको आरोप लगाउँदै सुनारसहित, रास्वपाकै सांसदहरू रीमा विश्वकर्मा, आशिष गजुरेलसहित चार सांसद धर्नामा बसेका थिए ।

सांसद सुनारले त प्रहरीको सिन्धुलीका एसपीलाई घिसार्ने भन्दै हिंसाप्रेरित अभिव्यक्ति दिएका थिए । पदीय आचरण, मर्यादा र गरिमालाई बिर्सेर दिएको यस्तो अभिव्यक्ति विवादमा परेको थियो ।