चीनको ‘शेन्झोउ–२१’ : तीन अन्तरिक्षयात्री २१० दिनपछि पृथ्वीमा फर्किए
Nepal One HD १७ जेठ २०८३ १५:१२
एजेन्सी । चीनको मानवयुक्त अन्तरिक्ष कार्यक्रमअन्तर्गत सञ्चालन गरिएको ‘शेन्झोउ–२१’ अन्तरिक्ष अभियान सफलतापूर्वक सम्पन्न भएको छ ।
अभियानमा सहभागी तीन अन्तरिक्षयात्री झाङ लु, वु फेई र झाङ होङझाङ २१० दिनको लामो अन्तरिक्ष बसाइपछि शनिबार सुरक्षित रूपमा पृथ्वीमा फर्किएका छन् ।
उनीहरू शुक्रबार साँझ अन्तरिक्ष केन्द्रबाट पृथ्वीमा अवतरण गरेका थिए भने शनिबार सकुशल रूपमा बेइजिङ पुगेका हुन् ।
चीनको मानवयुक्त अन्तरिक्ष कार्यक्रमसम्बन्धी निकायका अनुसार तीनै अन्तरिक्षयात्रीको स्वास्थ्य अवस्था सामान्य र स्थिर रहेको छ ।
अभियानका क्रममा उनीहरूले अन्तरिक्ष केन्द्रमा रहेर विभिन्न वैज्ञानिक अनुसन्धान, प्राविधिक परीक्षण तथा नियमित सञ्चालनसँग सम्बन्धित महत्वपूर्ण कार्यहरू सम्पन्न गरेका थिए ।
२१० दिनको निरन्तर बसाइ चीनको अन्तरिक्ष अनुसन्धान क्षमतामा महत्वपूर्ण उपलब्धि मानिएको छ ।
अवतरित भएपछि उनीहरूलाई चिकित्सकीय निगरानीमा राखिएको छ । प्रारम्भिक चरणमा स्वास्थ्य परीक्षण, शारीरिक अवस्थाको मूल्याङ्कन तथा पुनःस्थापना प्रक्रिया सञ्चालन गरिने बताइएको छ । लामो समय अन्तरिक्षमा बस्दा शरीरमा पर्ने प्रभावहरूको अध्ययनसमेत यस क्रममा गरिनेछ ।
सम्बन्धित निकायका अनुसार स्वास्थ्य परीक्षण र आवश्यक विश्रामपछि उनीहरूले बेइजिङमा पत्रकार सम्मेलन गर्दै आफ्नो अनुभव र अनुसन्धान उपलब्धिबारे विस्तृत जानकारी दिनेछन् ।
‘शेन्झोउ–२१’ अभियानलाई चीनको अन्तरिक्ष कार्यक्रमको अर्को महत्वपूर्ण उपलब्धिका रूपमा लिइएको छ ।
यस सफलताले आगामी अन्तरिक्ष अनुसन्धान तथा दीर्घकालीन अभियानका लागि आधार बलियो बनाएको बताइएको छ ।
