काठमाडौं । नेकपा एमालेका अध्यक्ष केपी शर्मा ओलीले बालेन सरकारले आफूलाई पक्राउ गरेपछि १३ दिनसम्म मुद्दा चलाउने आधार खोजे पनि कुनै प्रमाण फेला पार्न नसकेको दाबी गरेका छन्।

ओलीले आफूलाई पक्राउ गर्नु राजनीतिक प्रेरित कदम भएको संकेत गर्दै अन्ततः सरकारले रिहा गर्न बाध्य भएको बताए।

‘मलाई पक्राउ गरियो। १३ दिनसम्म प्रयास गरियो। तर मुद्दा चलाउने ठाउँ भेटिएन। त्यसपछि छोड्न बाध्य भए,’ उनले भने।

ओली १४ चैत २०८२ मा पक्राउ परेका थिए। उनीविरुद्ध फौजदारी कसुर सम्बन्धी मुद्दा अदालतमा विचाराधीन छ।

अदालतप्रति सम्मान व्यक्त गर्दै ओलीले न्यायपालिकाबाट निष्पक्ष र स्वच्छ न्यायको अपेक्षा रहेको बताए। उनले न्याय सम्पादनको गुणस्तरबाटै अदालतको प्रतिष्ठा स्थापित हुने धारणा राखे।

‘हामी अदालतलाई सम्मान गर्छौँ। अदालतबाट न्याय पाउनुपर्छ। स्वच्छ न्यायको अपेक्षा गर्छौँ,’ उनले भने।

ओलीले राज्य सञ्चालन र न्याय सम्पादनको प्रक्रियालाई विधिसम्मत, निष्पक्ष र न्यायोचित बनाउन आवश्यक रहेको उल्लेख गर्दै अदालतले तथ्य र प्रमाणका आधारमा निर्णय गर्ने विश्वास व्यक्त गरे।