काठमाडौं । नेपाली कांग्रेस धनकुटाका संविधानसभा सदस्य अञ्जना ताम्लीसहित १९ जना नेता तथा कार्यकर्ताले सामूहिक रूपमा पार्टी परित्याग गरेका छन्।

उनीहरूले कांग्रेसका सभापति गगन थापालाई सम्बोधन गर्दै पार्टीबाट अलग भएको घोषणा गरेका हुन्।

पार्टी परित्याग गर्नेमा महाधिवेशन प्रतिनिधि तथा पूर्व संविधानसभा सदस्य अञ्जना ताम्ली, कोशी प्रदेश सदस्य मीना राई, क्षेत्रीय सदस्य युवेन तुम्बा, क्षेत्रीय प्रतिनिधि राजकुमारी राईलगायत रहेका छन्।

पार्टीभित्र लामो समयदेखि वैचारिक मतभेद रहेको, संगठनभित्र काम गर्ने अनुकूल वातावरण नबनेको तथा आफ्ना धारणा र योगदानको उचित मूल्यांकन हुन नसकेको उल्लेख गर्दै उनीहरूले पार्टी छाड्ने निर्णय गरेको जनाएका छन्।

सामूहिक रूपमा पार्टी परित्याग गरेका नेताहरूले अब कुन राजनीतिक यात्रामा अघि बढ्ने भन्ने विषयमा भने औपचारिक घोषणा गरेका छैनन्।

यद्यपि, धनकुटाको राजनीतिक वृत्तमा उनीहरू हर्क साम्पाङ नेतृत्वको श्रम संस्कृति पार्टीमा आबद्ध हुन सक्ने चर्चा भइरहेको छ। यसबारे सम्बन्धित नेताहरूले भने कुनै आधिकारिक प्रतिक्रिया दिएका छैनन्।

स्थानीय तहदेखि प्रदेशस्तरसम्म जिम्मेवारीमा रहेका नेताहरूको एकैपटक पार्टीबाट बहिर्गमनले धनकुटामा नेपाली कांग्रेसको संगठनात्मक अवस्थामाथि नयाँ बहस सुरु भएको छ। पार्टी नेतृत्वले यसबारे औपचारिक प्रतिक्रिया सार्वजनिक गरिसकेको छैन।