काठमाडौं। नेपाली कांग्रेसको शेरबहादुर देउवा समूहको बैठक काठमाडौंको चुनदेवीस्थित सम्पर्क कार्यालयमा सुरु भएको छ।

निवर्तमान कार्यवाहक सभापति पूर्णबहादुर खड्काको अध्यक्षतामा बसेको बैठकमा १४औँ महाधिवेशनबाट निर्वाचित समूहका पदाधिकारी, केन्द्रीय सदस्य तथा पूर्वपदाधिकारीहरूको सहभागिता रहेको छ।

नेता डा. प्रकाशशरण महतका अनुसार बैठकमा पार्टीभित्र देखिएको आन्तरिक विवाद, त्यसको समाधानका सम्भावित उपाय तथा आगामी राजनीतिक रणनीतिबारे छलफल भइरहेको छ।

उनले समूहको सम्पर्क कार्यालय सोमबारदेखि औपचारिक रूपमा सञ्चालनमा आएको जानकारी दिँदै कार्यालय तयारी पूरा भएपछि पहिलो बैठक त्यहीँ आयोजना गरिएको बताए।

‘यसअघि कार्यालयमा रङरोगनलगायतका काम भइरहेको थियो। अहिले सबै तयारी पूरा भएकाले आजदेखि यहीँबाट औपचारिक रूपमा बैठक सुरु गरेका छौँ,’ डा. महतले भने।

देउवा समूहले विस्तारित बैठकपछि काठमाडौंमा राष्ट्रिय भेला आयोजना गर्ने तयारी पनि गरेको छ।

समूहका नेताहरूले भने राष्ट्रिय भेला अघि नै पार्टीको संस्थापन पक्षले आफूहरूले उठाएका मागबारे गम्भीर संवाद अघि बढाउनुपर्ने धारणा राखेका छन्।

उनीहरूका अनुसार पार्टीभित्रको विवाद समाधानका लागि सहमतिको प्रयास जारी रहनु आवश्यक छ।

पछिल्लो समय कांग्रेसभित्र देखिएको आन्तरिक विवाद समाधानका लागि संस्थापन र इतर समूहबीच पटक–पटक छलफल भए पनि कुनै ठोस निष्कर्ष निस्किएको छैन।

संस्थापन पक्षले इतर समूहका केही माग पार्टी विधानअनुसार कार्यान्वयन गर्न कठिन हुने बताउँदै आएको छ।

उता देउवा समूहले भने आफूहरूले उठाएका विषयमा सभापति गगन थापाले पर्याप्त गम्भीरता नदेखाएको आरोप लगाउँदै आएको छ।

यही परिस्थितिमा बसेको सोमबारको बैठकलाई देउवा समूहको आगामी राजनीतिक रणनीति तय गर्ने महत्वपूर्ण छलफलका रूपमा हेरिएको छ।