काठमाडौँ -नाट्यसम्राट बालकृष्ण समद्वारा रचित गजल विश्व कीर्तिमानी सङ्गीतकार एवं गायक सन्तोष श्रेष्ठको सङ्गीत र स्वरमा सार्वजनिक गरिएको छ ।

समद्वारा एक सय वर्षअघि रचना गरिएको उनको कृति ‘मेरो कविताको आराधन उपासना- १’मा सङ्कलित गजल ‘जान लाग्यो नाम जप्ने सास यो’लाई श्रेष्ठले सङ्गीतबद्ध गरी स्वर दिएका हुन् ।

महाकवि लक्ष्मीप्रसाद देवकोटा सङग्रहालय मैतीदेवीमा शनिबार आयोजित कार्यक्रममा उक्त गजलको श्रव्यदृश्य पनि सार्वजनिक गरिएको थियो ।

सार्वजनिक गजलबारे गजल अभियन्ता एवं समालोचक घनेन्द्र ओझाले चर्चा गर्दै सम नाट्यसम्राटका रूपमा सम्मानित रहे पनि उनले गजल पनि लेखेकामा खुसी व्यक्त गरे! ओझाले आदिगजलकार मोतीराम भट्टपछिका सर्जकहरूले गजल लेख्ने क्रम चलेको र त्यही मेसोमा समले पनि गजल लेखेका देखिएको सुनाए! समले गजल भनेरै नलेखे पनि गजलको शास्त्रीयताभित्र रहेर समले उक्त सिर्जना गरेका बताए।

कृष्णभक्तिमा केन्द्रित रहेर समले गजल लेखेका भन्दै ओझाले समका समकालीन त्रिमूर्तिहरू महाकवि देवकोटा, कविशिरोमणि लेखनाथ पौड्याल र सम तीनै जनाका गजल खोजेर सङ्गीतकार, गायक श्रेष्ठले सङ्गीतमा ल्याएका बताए ।

चलचित्र लेखक तथा निर्देशक मोहन निरौलाले सन्तोष श्रेष्ठ साहित्य र सङ्गीतमा नयाँनयाँ काम गर्न रुचाउने व्यक्ति भएकाले यस्ता राम्रा कामहरू सन्तोषबाट हुँदा खुसी लागेको बताए ।

गजलकार राधा कणेलले सन्तोष श्रेष्ठ र घनेन्द्र ओझाले २ वर्षअघि घोषणा गरेको ‘नेपाली गजल गायन स्वर्ण दशक, वि. सं. २०८०-२०९०’ अभियानले छोटो समयमै देशका विभिन्न भागमा करिब एक दर्जन प्रत्यक्ष गजल गायन गरिसकेको, केही एल्बम ल्याइसकेको भन्दै यही मेसोमा नेपाली साहित्यका त्रिमूर्तिहरू देवकोटा, पौड्याल र समका गजल पनि सङ्गीतमा ल्याइनु राम्रो काम भएको बताइन् ।

महाकवि देवकोटाका सुपुत्र प्रा. डा. पद्मप्रसाद देवकोटाले अग्रजहरूको सम्मान गर्न सन्तोष श्रेष्ठले जानेका भन्दै प्रशंसा गरे ।सङ्गीतकार, गायक श्रेष्ठले आफूले कुनै व्यावसायिक लाभका लागि नभई अग्रजको सम्मानका खातिर मात्र यस्ता काम गरिरहेको बताए।

प्रमुख अतिथि प्रा. डा. कृष्णहरि बरालले नेपाली गजल गायनमा सङ्गीतकार श्रेष्ठको सक्रियता र लगाव उल्लेखनीय रहेको बताए।नेपाली गजललाई सङ्गीतमा ल्याउने सन्तोषको प्रयासको बरालले सराहना पनि गरे।अनाममण्डलीले आयोजना गरेको कार्यक्रमको सभापतित्व प्रभाती किरणले गरेका थिए भने सहजीकरण रूपक अलङ्कारले गरेका थिए।