काठमाडौं। आईसीसी क्रिकेट विश्वकप लिग–२ अन्तर्गत नेपालले आज नामिबियाविरुद्ध आफ्नो पहिलो खेल खेल्दैछ।

खेलमा नामिबियाले टस जितेर पहिले बलिङ गर्ने निर्णय गरेपछि नेपाल ब्याटिङमा उत्रिएको छ।

नेपाल, नामिबिया र नेदरल्यान्ड्स सहभागी त्रिदेशीय सिरिजको यो पहिलो खेल हो। नेपालले यस खेलबाट महत्वपूर्ण अंक जोड्ने लक्ष्य राखेको छ।

हालसम्म २८ खेल खेलेको नेपाल २४ अंकसहित लिग–२ को अंकतालिकामा पाँचौं स्थानमा रहेको छ। समान खेल खेलेको नामिबिया २२ अंकका साथ सातौं स्थानमा छ। यस सिरिजको अर्को टोली नेदरल्यान्ड्स भने ३२ अंकसहित तेस्रो स्थानमा रहेको छ।

विश्वकप छनोट यात्राका लागि लिग–२ का प्रत्येक खेल महत्त्वपूर्ण मानिएकाले नेपाल र नामिबिया दुवै टोली जित निकाल्ने लक्ष्यका साथ मैदानमा उत्रिएका छन्।