काठमाडौं। प्रधानमन्त्री वालेन्द्र शाहले नेपाली तयारी पोशाक उद्योगलाई पुनर्जीवित गर्दै उत्पादन, रोजगारी र निर्यात विस्तारका लागि सरकारले आवश्यक नीतिगत तथा प्रशासनिक सहजीकरण गर्ने प्रतिबद्धता जनाएका छन्।

मंगलबार प्रधानमन्त्री तथा मन्त्रिपरिषद्को कार्यालयमा नेपाल तयारी पोशाक उद्योग संघका पदाधिकारीसँग भएको छलफलमा प्रधानमन्त्री शाहले लामो समयदेखि उद्योगले भोग्दै आएका समस्या समाधानलाई सरकारको प्राथमिकतामा राखिएको बताए।

नेपाल तयारी पोशाक उद्योग संघका अध्यक्ष पशुपतिदेव पाण्डेका अनुसार छलफलमा उद्योग क्षेत्रको वर्तमान अवस्था, उत्पादन क्षमता, निर्यातमा देखिएका चुनौती तथा उद्योग पुनरुत्थानका उपायबारे विस्तृत रूपमा समीक्षा गरिएको थियो। विशेषगरी सन् २००५ अघिको जस्तै प्रतिस्पर्धी अवस्थामा नेपाली तयारी पोशाक उद्योगलाई फर्काउने विषयमा केन्द्रित भएर छलफल भएको उनले जानकारी दिए।

छलफलका क्रममा विभिन्न मन्त्रालयमा लामो समयदेखि रोकिएका तथा प्रशासनिक प्रक्रियामा अड्किएका विषय तत्काल सम्बन्धित निकायको बैठक बोलाएर समाधान गर्न प्रधानमन्त्रीले निर्देशन दिएको पाण्डेको भनाइ छ।

प्रधानमन्त्री शाहले करिब दुई दशकदेखि बन्द अवस्थामा रहेका रुग्ण तयारी पोशाक उद्योगलाई पुनः सञ्चालनमा ल्याउने योजना सरकारको प्राथमिकतामा रहेको उल्लेख गरे। उनका अनुसार स्वदेशमै उत्पादन बढाएर आयात प्रतिस्थापन गर्नुका साथै निर्यात विस्तारमार्फत विदेशी मुद्रा आर्जन र रोजगारी सिर्जनामा जोड दिइनेछ।

पोशाक तथा कपडा उद्योगको दीर्घकालीन विकासका लागि छुट्टै टेक्स्टाइल काउन्सिल गठन गर्ने अवधारणासमेत प्रधानमन्त्रीले अघि सारेका छन्। यस्तो संस्थागत संयन्त्रमार्फत उद्योगका नीति, उत्पादन, गुणस्तर र बजार विस्तारका विषयलाई एकीकृत रूपमा अघि बढाइने सरकारको योजना रहेको बताइएको छ।

छलफलमा अमेरिकी बजारतर्फ निर्यात गर्दा प्रयोगशाला परीक्षण तथा प्रमाणीकरणका कारण देखिएका अवरोध पनि उठाइएको थियो। त्यस विषयमा आवश्यक कूटनीतिक पहल गरी समस्या समाधान गर्न प्रधानमन्त्री शाहले परराष्ट्र मन्त्रालयलाई तत्काल सहजीकरण गर्न निर्देशन दिएका छन्।