काठमाडौं । सरकारले राहदानी विभाग अगाडि आत्मदाह प्रयासपछि ज्यान गुमाएका गणेश नेपालीको घटनाबारे सत्यतथ्य छानबिन गर्न न्यायिक समिति गठन गरेको छ।

बुधबार बसेको मन्त्रिपरिषद् बैठकले उच्च अदालतका पूर्वन्यायाधीश केशवप्रसाद बाँस्तोलाको अध्यक्षतामा न्यायिक समिति गठन गर्ने निर्णय गरेको हो।

सरकारका प्रवक्ता तथा शिक्षामन्त्री सस्मित पोखरेलले समितिले घटनाका सबै पक्षको अध्ययन गरी सत्यतथ्य पत्ता लगाउने जानकारी दिए।

मुगुका २५ वर्षीय गणेश नेपालीले काठमाडौंको त्रिपुरेश्वरस्थित राहदानी विभाग अगाडि आत्मदाह प्रयास गरेका थिए। उपचारका क्रममा उनको वीर अस्पतालमा निधन भएको थियो।

सरकारले उक्त घटनाको कारण, परिस्थितिलगायत पक्षबारे निष्पक्ष छानबिन गर्न न्यायिक समिति गठन गरेको जनाएको छ।