काठमाडौं। राष्ट्रिय स्वतन्त्र पार्टी (रास्वपा) ले आफ्ना संघीय सांसदहरूलाई स्वकीय सचिव नियुक्त गर्दा परिवारका सदस्य वा नजिकका आफन्तलाई नियुक्त नगर्न आन्तरिक निर्देशन जारी गरेको छ।

पार्टीले राज्यकोषबाट उपलब्ध हुने सुविधाको पारदर्शी र जनउत्तरदायी प्रयोग सुनिश्चित गर्ने उद्देश्यले यस्तो मापदण्ड लागू गरेको जनाएको हो।

रास्वपाका महामन्त्री विपिनकुमार आचार्यद्वारा शुक्रबार जारी गरिएको ‘स्वकीय सचिव नियुक्तिसम्बन्धी आधारभूत मापदण्ड’ मा नातावाद र परिवारवादलाई पूर्ण रूपमा निषेध गरिएको उल्लेख छ।

निर्देशनमा स्वकीय सचिव नियुक्ति गर्दा पार्टीको विधान र सुशासनको मूल नीतिअनुसार एकाघरका सदस्य तथा नजिकका नातेदारलाई नियुक्त गर्न नपाइने स्पष्ट व्यवस्था गरिएको छ। नियुक्ति पारिवारिक सम्बन्धभन्दा बाहिरबाट मात्रै गर्नुपर्ने पनि निर्देशनमा उल्लेख छ।

सरकारले हालै संघीय संसद्का सदस्यलाई एक जना स्वकीय सचिव राख्न पाउने व्यवस्था गर्दै त्यससम्बन्धी निर्णय राजपत्रमा प्रकाशित गरिसकेको छ। संशोधित व्यवस्थाअनुसार प्रत्येक सांसदले राजपत्राङ्कित तृतीय श्रेणी (शाखा अधिकृत सरह) को एक जना स्वकीय सचिव नियुक्त गर्न पाउनेछन्। यो सुविधा संघीय संसद्का सदस्यहरूको कानून निर्माण, नीतिगत बहस तथा जनगुनासो सम्बोधनजस्ता जिम्मेवारी प्रभावकारी बनाउन दिइएको हो।

रास्वपाले भने राज्यकोषबाट उपलब्ध हुने उक्त सुविधाको दुरुपयोग नहोस् भन्ने उद्देश्यले आफ्ना सांसदका लागि छुट्टै आन्तरिक मापदण्ड जारी गरेको जनाएको छ। पार्टीका अनुसार स्वकीय सचिव नियुक्ति प्रक्रिया पारदर्शी, मितव्ययी र सुशासनको सिद्धान्तअनुकूल हुनुपर्नेमा जोड दिइएको छ।