काठमाडौं। मुगुको मुगम कार्मारोङ गाउँपालिका–५ पुलु बजारमा शनिबार बिहान ढुंगासहितको पहिरो घरमाथि खस्दा तीन वर्षीय बालकको ज्यान गएको छ भने उनका बाबुआमा घाइते भएका छन्।

साउन ९ गते बिहान करिब ४ बजे पेमा लामाको घरमा भाडामा बस्दै होटल सञ्चालन गरिरहेका छायाँनाथ रारा नगरपालिका–१३ तिर्पका जगनाथ बडुवालको परिवार सुतिरहेका बेला माथिबाट आएको पहिरो घरमा खसेको थियो।

पहिरोमा च्यापिएका तीन वर्षीय रमेश बडुवाललाई प्रहरी चौकी डोल्फु पुलुको टोलीले उद्धार गरी बिहान ४:४८ बजे पुलु स्वास्थ्य चौकी पुर्‍याएको थियो। उपचारका क्रममा बिहान ५:४५ बजे चिकित्सकले उनलाई मृत घोषणा गरेका हुन्।

घटनामा रमेशका बुबा ३२ वर्षीय जगनाथ बडुवाल र आमा २७ वर्षीया सृजना बडुवाल सामान्य घाइते भएका छन्। उनीहरूको पुलु स्वास्थ्य चौकीमा उपचार भइरहेको छ र स्वास्थ्य अवस्था सामान्य रहेको प्रहरीले जनाएको छ।

पहिरोले घर पूर्ण रूपमा क्षतिग्रस्त बनाएको छ। थप पहिरोको जोखिम कायम रहेकाले आसपासका आठ घरका बासिन्दालाई सुरक्षित स्थानमा सारिएको छ।