काठमाडौं। नेपाल राष्ट्र बैंकले भुक्तानी प्रणालीसम्बन्धी एकीकृत निर्देशन २०८२ संशोधन गर्दै विद्युतीय वालेट (ई–वालेट) सञ्चालनका लागि राष्ट्रिय परिचयपत्र अनिवार्य गर्ने नयाँ व्यवस्था लागू गरेको छ।

नयाँ निर्देशनअनुसार अब नेपाली नागरिकले ई–वालेट खोल्दा राष्ट्रिय परिचयपत्रको विद्युतीय अभिलेखमार्फत आफ्नो विवरण प्रमाणीकरण गर्नुपर्नेछ। यससँगै हाल सञ्चालनमा रहेका सबै ई–वालेट प्रयोगकर्ताले पनि २०८३ असोज मसान्तभित्र आफ्नो राष्ट्रिय परिचयपत्रको नम्बर वा विवरण मोबाइल एप वा सम्बन्धित माध्यमबाट अद्यावधिक गर्नुपर्ने व्यवस्था गरिएको छ।

राष्ट्र बैंकले राष्ट्रिय परिचयपत्र नलिएका प्रयोगकर्तालाई भने प्रत्येक महिना परिचयपत्र बनाउन र केवाईसी (नो योर कस्टमर) विवरण अद्यावधिक गर्न सूचना दिन भुक्तानी सेवा प्रदायक संस्थालाई निर्देशन दिएको छ।

विदेशमा रहेका नेपाली नागरिकले भने राष्ट्रिय परिचयपत्रबाहेक अन्य आवश्यक कागजातका आधारमा अनलाइनबाट ई–वालेट खोल्न सक्नेछन्। तर नेपाल फर्किएपछि ३५ दिनभित्र राष्ट्रिय परिचयपत्रको विवरण अनिवार्य रूपमा अद्यावधिक गर्नुपर्नेछ।

त्यस्तै, अशक्त, असहाय वा आफ्नै हेरचाह गर्न नसक्ने नागरिकका लागि पनि विशेष व्यवस्था गरिएको छ। उनीहरूले अन्य आवश्यक कागजातका आधारमा ई–वालेट खोल्न र डिजिटल भुक्तानी सेवा प्रयोग गर्न सक्ने राष्ट्र बैंकले जनाएको छ।

राष्ट्र बैंकका अनुसार नयाँ व्यवस्थाको उद्देश्य विद्युतीय भुक्तानी प्रणालीलाई थप सुरक्षित, विश्वसनीय र अद्यावधिक परिचय प्रणालीसँग आबद्ध बनाउनु हो।