काठमाडौं। बागलुङको बडिगाड गाउँपालिका-१ का १७ वर्षीय लजिन थापाको हत्या उनकै साथीहरूले गरेको प्रहरीले जनाएको छ। साथीको जन्मदिन मनाउन गएका लजिनको मोबाइल फोनको विषयमा भएको सामान्य विवादले अन्ततः ज्यान लिने घटनामा परिणत भएको प्रारम्भिक अनुसन्धानबाट खुलेको हो।

जिल्ला प्रहरी कार्यालय बागलुङका अनुसार घटनामा संलग्न रहेको आरोपमा २० वर्षीय रेमबहादुर विक, १९ वर्षीय सुदीप विक, १६ वर्षीय असिम वन र १५ वर्षीय ददी परियारलाई नियन्त्रणमा लिइएको छ। उनीहरूमाथि व्यक्ति बेपत्ता पारेको कसुरमा मुद्दा दर्ता गरी थप अनुसन्धान भइरहेको प्रहरीले जनाएको छ।

घटना साउन १ गते रातिको हो। सोही दिन असिम वनको जन्मदिन मनाउन लजिनसहित सात जना साथीहरू स्थानीय दगातुम्डाँडा प्राथमिक विद्यालय परिसरमा भेला भएका थिए। प्रहरीका अनुसार उनीहरूले राति करिब २:३० बजेसम्म मदिरा सेवन गरेका थिए। जन्मदिनको कार्यक्रममा एक जना ९ वर्षीय बालकसमेत सहभागी रहेको प्रारम्भिक अनुसन्धानबाट खुलेको छ।

कार्यक्रम सकिएपछि अधिकांश साथीहरू घर फर्किए पनि लजिनसँग रहेको आइफोन मोबाइल माग्ने विषयमा विवाद सुरु भएको प्रहरीको भनाइ छ। जिल्ला प्रहरी कार्यालयका प्रहरी उपरीक्षक फडिन्द्र प्रसाईंका अनुसार मोबाइल दिन अस्वीकार गरेपछि लजिनमाथि कुटपिट गरिएको थियो।

प्रहरीका अनुसार रेमबहादुर विक र ददी परियारले लजिनलाई पछ्याउँदै एकान्त स्थानमा पुर्‍याएर आक्रमण गरेका थिए। कुटपिटका क्रममा लजिन बेहोस भएका र त्यसपछि उनको मृत्यु भएको प्रारम्भिक अनुसन्धानले देखाएको छ।

मृत्युपछि घटनालाई लुकाउने उद्देश्यले उनीहरूले शव घटनास्थलबाट करिब आधा घण्टाको दूरीमा रहेको स्थानीय मनखोलामा लगेर फालेको अनुसन्धानबाट खुलेको छ। लजिनको शव बिहीबार त्यही स्थानबाट फेला परेको थियो।

घटनापछि लजिन एक सातासम्म सम्पर्कविहीन भएका थिए। परिवारले खोजी गरे पनि अवस्था थाहा नपाएपछि प्रहरीले व्यापक खोज अभियान सञ्चालन गरेको थियो। खोजीका क्रममा प्राविधिक विज्ञ, तालिमप्राप्त कुकुर, ड्रोन क्यामेरा तथा अन्य आधुनिक प्रविधिको प्रयोग गरिएको प्रहरीले जनाएको छ। त्यसपछि अनुसन्धानको घेरा साँघुरिँदै जाँदा घटनामा संलग्न व्यक्तिहरू पक्राउ परेका हुन्।

प्रहरीले पक्राउ परेकाहरूको बयान, घटनास्थलबाट संकलित प्रमाण र प्राविधिक विश्लेषणका आधारमा घटनाको विस्तृत अनुसन्धान अघि बढाइरहेको जनाएको छ। पोस्टमार्टम प्रतिवेदन र अन्य प्रमाणका आधारमा उनीहरूमाथि थप कानुनी कारबाही अघि बढाइने प्रहरीले जनाएको छ।