सुनसरी। स्थानीय प्रशासनले जारी गरेको कर्फ्यु आदेशको अवज्ञा गर्दै प्रदर्शन उग्र बनेपछि देवानगञ्ज गाउँपालिका–३ स्थित कप्तानगञ्ज क्षेत्रमा नेपाली सेना परिचालन गरिएको छ।

कर्फ्युका बाबजुद प्रदर्शनकारीले आगजनी र तोडफोडमा उत्रिएपछि स्थिति नियन्त्रणमा लिन नेपाली सेनाको हतियारसहितको टोली खटाइएको हो। सेनाको टोली परिचालनसँगै कप्तानगञ्जको अवस्था नियन्त्रणमा आउन थालेको स्थानीय प्रशासनले जनाएको छ।

सुनसरी प्रहरीका प्रवक्ता डीएसपी चन्द्र खड्काले सुरक्षा निकायले अवस्था पूर्ण रूपमा सामान्य बनाउन आवश्यक प्रयास गरिरहेको बताए।

आइतबार राति कप्तानगञ्जमा दुई समूहबीच भएको झडप नियन्त्रण गर्ने क्रममा सुरक्षाकर्मीले चलाएको गोली लागेर देवानगञ्ज गाउँपालिका–३ का २४ वर्षीय ओमप्रकाश मेहताको मृत्यु भएको थियो। उक्त घटनामा गोली लागेर नौ जना सर्वसाधारण घाइते भएका छन्। घाइतेमध्ये एक जनाको अवस्था गम्भीर रहेको जनाइएको छ।