काठमाडौं। नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ र सहसंयोजक माधव नेपालबीच सोमबार बिहान भेटवार्ता भएको छ।

प्रचण्ड नेपाल निवास पुगेर भएको भेटमा एमालेसँग भएको सत्ता सहमति, प्रदेश सरकार गठन र आगामी राजनीतिक रणनीतिबारे छलफल भएको नेताहरूले बताएका छन्।

नेकपाका एक नेताका अनुसार भेटमा एमाले अध्यक्ष केपी शर्मा ओलीसँग शनिबार भएको तीनबुँदे सहमतिको समीक्षा गरिएको थियो। उनले बाहिर चर्चा भएजस्तो पार्टीभित्र कुनै असहमति नरहेको दाबी गर्दै प्रदेश सरकारको नेतृत्व, मुख्यमन्त्री र मन्त्रीहरूको टुंगो लगाउने तथा आगामी राजनीतिक कदमबारे केन्द्रित भएर छलफल भएको जानकारी दिए।

‘एमालेसँग भएको सहमतिबारे समीक्षा भयो। बाहिर चर्चा भएजस्तो कुनै असहमति छैन। प्रदेशमा मुख्यमन्त्री र मन्त्रीहरूको टुंगो कसरी लगाउने तथा अबको रणनीति कस्तो बनाउने भन्ने विषयमा मुख्य रूपमा छलफल भयो,’ ती नेताले भने।

शनिबार एमाले अध्यक्ष केपी शर्मा ओली र नेकपाका संयोजक प्रचण्डबीच प्रदेश सरकार सञ्चालनसम्बन्धी तीनबुँदे सहमति भएको थियो। उक्त सहमतिपछि विभिन्न प्रदेशमा नयाँ सत्ता समीकरण बन्ने प्रक्रिया अघि बढिरहेको छ।

यसअघि सहसंयोजक माधव नेपाल एमालेसँग भएको सहमतिप्रति असन्तुष्ट रहेको चर्चा चलेको थियो। उनले आइतबार आफूनिकट केही नेताहरूसँग छलफलसमेत गरेका थिए। त्यसपछि प्रचण्ड स्वयं नेपाल निवास पुगेर भेट गरेपछि पार्टीभित्र देखिएको असन्तुष्टिबारे पनि चासो बढेको थियो।

यद्यपि नेकपाका नेताहरूले भने सहमतिलाई लिएर नेतृत्वबीच कुनै मतभेद नरहेको दाबी गरेका छन्। उनीहरूका अनुसार अहिलेको प्राथमिकता प्रदेश सरकार गठनलाई छिटो निष्कर्षमा पुर्‍याउने र सत्ता साझेदारीलाई प्रभावकारी रूपमा कार्यान्वयन गर्ने रहेको छ।

शनिबार भएको एमाले-नेकपा सहमतिले कर्णालीसहित विभिन्न प्रदेशको राजनीतिक समीकरणमा प्रत्यक्ष प्रभाव पारेको छ। आगामी केही दिनभित्र प्रदेश सरकारहरूको नेतृत्व र मन्त्रिपरिषद् गठनबारे थप निर्णय हुने अपेक्षा गरिएको छ।