काठमाडौं। नेपाली कांग्रेसले वरिष्ठ नेता गोपालमान श्रेष्ठको निधनपछि केन्द्रीय कार्यसमितिको आकस्मिक बैठक बोलाएको छ।

पार्टीका कामु मुख्य सचिव कृष्णप्रसाद पौडेलद्वारा जारी सूचनाअनुसार बुधबार बिहान ८:३० बजे ललितपुरस्थित बी.पी. स्मृति भवन, सानेपामा केन्द्रीय कार्यसमितिको आकस्मिक बैठक बस्नेछ। बैठकमा केन्द्रीय कार्यसमितिका पदाधिकारी तथा सदस्यहरूलाई अनिवार्य उपस्थित हुन निर्देशन दिइएको छ।

सूचनामा वरिष्ठ नेता श्रेष्ठप्रति श्रद्धाञ्जली अर्पण गर्न बुधबार बिहान ९ बजेदेखि ११ बजेसम्म पार्टीको केन्द्रीय कार्यालयमा उनको पार्थिव शरीर राखिने उल्लेख गरिएको छ। त्यसपछि पशुपति आर्यघाटमा अन्तिम बिदाइ गरिने कार्यक्रम रहेको कांग्रेसले जनाएको छ।

वरिष्ठ नेता श्रेष्ठको आइतबार उपचारका क्रममा निधन भएपछि नेपाली कांग्रेसले शोक प्रस्ताव पारित गर्न र श्रद्धाञ्जली कार्यक्रम तय गर्न आकस्मिक बैठक बोलाएको हो।